शुभम देशमुख 
गोंदिया : घरात सकाळी स्वयंपाक केला जात असताना सिलेंडरमधून गॅस लिकेज होऊन गॅसचा भडका उडाला. या भडक्याने क्षणार्धात घराला आग लागून संसारोपयोगी साहित्य जळून खाक झाले आहे. सुदैवाने यात कोणत्याही प्रकारची जीवितहानी झाली नाही. मात्र आगीमुळे संसार उघड्यावर आला आहे.  

गोंदिया जिल्ह्यातील अर्जुनी- मोरगाव तालुक्याअंतर्गत येणाऱ्या खामखुरा गावात हि घटना घडली आहे. गावातील माधव नेवारे यांच्या घरात गॅसचा भडका उडाल्याने गॅस सिलेंडरला एका बाजूने फट पडली. यामुळे आगीचा भडका अधिक उडाला. यात माधव नेवारे यांचे घर लाकूड व मातीचे असल्याने घराणे क्षणार्धात पेट घेतला. अवघ्या काही मिनिटातच घर पूर्णतः जळून खाक झाले. यात घरातील साहित्य देखील जळले आहे. 

सध्या शेतीचे कामे सुरु असल्याने माधव नेवारे यांनी मजुरांना पैसे देण्याकरिता तसेच धान रोवणी कामाचे मुख्य असल्याने शेतकऱ्यांकडील रोवणीच्या कामाचे ३४ हजार रुपये जमा करून घरी ठेवले होते. तर त्यांच्या मुलाने ७ हजार रुपये जमा करू ठेवलेले होते. असे एकूण ४१ हजार रुपयांची रोकडसह घरातील जीवनाश्क्य वस्तू जळून खाक झाल्या आहेत. घरातील सर्व वस्तू जळाल्याने त्यांच्यासमोर उदरनिर्वाहाचा प्रश्न निर्माण झाला आहे. सदर घटनेत झालेल्या नुकसानीची भरपाई देण्याची मागणी केली जात आहे.