शुभम देशमुख 
गोंदिया : गोंदिया जिल्ह्यातील मोरगाव अर्जुनी विधानसभेत काँग्रेसने तिरोड्याचे माजी आमदार दिलीप बनसोड यांना उमेदवारी दिली आहे. बाहेरचा उमेदवार दिल्यामुळे नाना पटोले यांची गाडी स्थानिक इच्छुक उमेदवारांनी रोखून धरली होती. यावेळी कार्यकर्त्यांनी पटोले यांच्याजवळ प्रचंड रोष व्यक्त केला. 

विधानसभा निवडणुकीसाठी मोरगाव अर्जुनी विधानसभा मतदारसंघात काँग्रेसचे (Congress) स्थानिकांना उमेदवारी न देता दिलीप बनसोडे यांना उमेदवारी दिल्याने काँग्रेसच्या पदाधिकाऱ्यांमध्ये प्रचंड नाराजी पसरली होती. दरम्यान काँग्रेसचे प्रदेशाध्यक्ष नाना पटोले हे गोंदिया येथे सभेसाठी आले असता, कार्यकर्त्यांनी त्यांच्यावर (Nana Patole) रोष व्यक्त करत गाडी अडवून धरली होती. बराच वेळ हा गोंधळ सुरु होता. 

स्थानिक उमेदवारांनी काय चूक केली? असा सवाल यावेळी काँग्रेस कार्यकर्त्यांनी विचारला. अनेक कार्यकर्ते नाना पटोले यांच्या ताफ्यासमोर आडवे झाले होते. दरम्यान पोलिसांनी मध्यस्थी करत कार्यकर्त्यांना बाजूला सारत पोलिसांनी नाना पटोले यांना सभास्थळापर्यंत नेले आहे. मात्र कार्यकर्त्यांमध्ये प्रचंड रोष असून ते सभास्थळच्या बाहेर थांबून आहेत. यामुळे पुन्हा एकदा राडा होण्याची शक्यता वर्तविली जात आहे.