रणजित माजगावकर, साम टीव्ही

कोल्हापूर : दूध उत्पादक शेतकऱ्यांसाठी महत्वाची बातमी हाती आली आहे. गोकूळ दूध महासंघाकडून दूधाच्या दरात वाढ करण्याचा निर्णय घेण्यात आला आहे. गोकूळने म्हैस दूध खरेदी एक रुपये तर गाय दूध खरेदीमध्ये २ रुपयांची वाढ करण्याचा निर्णय घेतलाय. गोकूळच्या निर्णयाने उत्पादकांना मोठा दिलासा मिळाला आहे. परंतु ग्राहकांना मोठा फटका बसला आहे.

गोकुळ दूध संघाच्या संचालक मंडळाच्या बैठकीत आज शुक्रवारी महत्त्वाचा निर्णय घेण्यात आला. आगामी निवडणुकीच्या पार्श्वभूमीवर दूध उत्पादकांना दिलासा देण्यासाठी दूध खरेदी दरात वाढ करण्यात आली आहे. या निर्णयाचा थेट परिणाम ग्राहकांच्या खिशावर होणार आहे. आज शुक्रवारी संध्याकाळपासून नवे दर लागू होणार आहेत.

गोकुळ दूध महासंघाकडून म्हैस आणि गाईच्या दुधाच्या खरेदी दरात वाढ जाहीर करण्यात आली आहे. म्हशीच्या दुधासाठी प्रतिलिटर १ रुपयांची वाढ करण्यात आली आहे. याआधी ५२ रुपये ५० पैशांनी खरेदी होणारे दूध आता ५३ रुपये ५० पैशांनी खरेदी केले जाणार आहे. गाईच्या दुधासाठी प्रतिलिटर २ रुपयांची वाढ करण्यात आली आहे. याआधी ३४ रुपयांनी खरेदी होणारे गायीचे दूध आता ३६ रुपये प्रतिलिटर दराने खरेदी केले जाणार आहे.

तत्पूर्वी, खरेदी दरवाढीसोबतच विक्री दरातही वाढ करण्यात आली आहे. म्हशीच्या दुधाच्या विक्री दरात २ रुपयांची वाढ करण्यात आली आहे. ६८ रुपयांनी विकले जाणारे दूध आता ७० रुपये प्रतिलिटर दराने ग्राहकांना मिळणार आहे. हा निर्णय आज झालेल्या संचालक मंडळाच्या बैठकीत मंजूर करण्यात आला आहे. आज शुक्रवारी संध्याकाळपासून हे नवे दर लागू होणार आहेत. निवडणुकीच्या तोंडावर उत्पादकांना दिलासा देण्याचा प्रयत्न म्हणून या निर्णयाकडे पाहिले जात असले, तरी सर्वसामान्य ग्राहकांना मात्र वाढीव दरांचा फटका बसणार आहे.