सोशल मीडियावरून ओळख झाली. त्याच अकाउंटवर व्हिडिओ कॉल करून मुलीशी संपर्क साधला. आंघोळ करत असताना तिच्या नकळत सोशल मीडियावरून केलेला व्हिडिओ कॉल रेकॉर्ड केला. तरुणानं तिला ब्लॅकमेल करायला सुरुवात केली. शरीरसंबंधांची मागणी केली. तिनं नकार दिला. निर्ढावलेल्या तरुणानं तोच व्हिडिओ सोशल मीडियावर व्हायरल केला. अखेर ब्लॅकमेलिंगला त्रासून पीडित मुलीनं पोलिसांत तक्रार दाखल केली. त्यानंतर ही घटना उघडकीस आली आहे.

नवी मुंबईत ही धक्कादायक घटना घडली आहे. एका १९ वर्षांच्या तरुणानं अल्पवयीन मुलीचा आंघोळ करत असताना व्हिडिओ काढला. त्यानंतर मुलीला ब्लॅकमेल करण्यास सुरुवात केली. तिच्याकडे शरीरसंबंधांची मागणीही केली. तिनं नकार देताच तरुणानं तो व्हिडिओ सोशल मीडियावर व्हायरल केला. ही घटना उघडकीस आल्यानंतर पीडितेच्या तक्रारीनुसार, पोलिसांनी गुन्हा नोंदवला आहे.

शरीरसंबंधांस नकार देताच व्हिडिओ केला व्हायरल

पोलिसांच्या माहितीनुसार, संशयित आरोपीने पीडितेशी सोशल मीडियावरून संपर्क साधला. तिच्या अकाउंटवर व्हिडिओ कॉल केला. पीडित मुलीचा आंघोळ करताना व्हिडिओ रेकॉर्ड केला. तरुणाने केलेल्या या प्रकाराची पीडितेला पुसटशी कल्पनाही नव्हती. या व्हिडिओच्या माध्यमातून आरोपीने तिला ब्लॅकमेल करण्यास सुरुवात केली.

आंघोळ करतानाचा व्हिडिओ आपल्याकडे असल्याचे सांगून आरोपीनं पीडित मुलीला ब्लॅकमेल करण्यास सुरुवात केली. तिच्याकडे वारंवार शरीरसंबंधांची मागणी करू लागला. त्याला मुलीने नकार दिला. त्यामुळं आरोपीने तिचा तो व्हिडिओ सोशल मीडियावर व्हायरल केला.

आरोपीवर गुन्हा दाखल

ब्लॅकमेलिंगला त्रासलेल्या मुलीनं अखेर हा सगळा प्रकार पोलिसांना सांगितला. २३ जून रोजी या मुलीने आरोपी तरुणाविरोधात पोलिसांत तक्रार दाखल केली. पीडितेच्या तक्रारीनंतर रबाळे एमआयडीसी पोलिसांनी आरोपीविरोधात गुन्हा नोंदवला आहे. आरोपीविरोधात भारतीय न्याय संहितेंतर्गत मानहानी, धमकावणे, पॉक्सो अॅक्ट आणि आयटी अॅक्टसह विविध कलमांन्वये गुन्हा दाखल केला आहे.

मीडिया रिपोर्टनुसार, पोलिसांनी सांगितले की अद्याप आरोपीला या प्रकरणात अटक झालेली नाही. या प्रकरणाचा तपास वेगाने सुरू आहे. सोशल मीडियाच्या माध्यमातून अशा प्रकारचे गुन्हे करणाऱ्यांवर करडी नजर ठेवण्यात येत आहे. असे प्रकार उघडकीस आल्यास कठोर कारवाई करण्यात येईल, असा इशाराही दिला आहे. पालकांनीही आपल्या मुलांना सोशल मीडियाचा वापर करताना सावध राहण्याच्या सूचना द्याव्यात. कोणतंही संशयास्पद कृत्य दिसून आल्यास याबाबत लगेच माहिती द्या, असे आवाहनही पोलिसांनी केले आहे.