सिंधुदुर्ग : देवगड जामसंडे नगरपंचायतचा स्वच्छतेबाबत बेफिकीरपणा जनतेसमोर उघड झाला आहे. देवगडच्या कोविड सेंटरमधील ओला व सुका कचरा चक्क कोविड सेंटर समोर असलेल्या तालुका वैद्यकीय अधिकारी यांच्या निवासस्थानातील रूममध्ये कचरा साठवून ठेवण्यात आला असल्याची धक्कादायक बाब समोर आली आहे.

हे देखील पहा -

या कचऱ्यामध्ये कोविड पॉझिटिव्ह मयत रुग्णांचे साहित्य, तसेच कोविड सेंटर मधील ओला व सुका कचरा एकत्र करून मोठ्या प्लॅस्टिक पिशव्यांमध्ये भरण्यात आलेला आहे. सुमारे 50 ते 60 मोठ्या पिशव्या भरून हा कचरा वैद्यकीय अधिकाऱ्यांच्या रूममध्ये ठेवण्यात आला असल्याचे शिवसेना पदाधिकारी यांच्या निदर्शनास येतात त्यांनी याबाबत नगर पंचायतीला निवेदन देऊन संबंधित प्रकार उघडकीस आणला आहे.

कोविड सेंटरच्या बाजूला असलेल्या तालुका वैद्यकीय अधिकारी यांच्या निवासस्थानातील रूममध्ये हा साठवून ठेवलेला कचरा कुजल्याने मोठ्या प्रमाणात दुर्गंधी पसरली होती. एकीकडे स्वच्छतेचा नारा देत असताना अशा अस्वच्छतेमुळे रोगराई वाढल्यावर कोण जबाबदार हाही प्रश्न उपस्थित होत आहे. शिवसेनेने संबंधित प्रकार उघडकीस आल्यानंतर नगरपंचायतीने घंटागाडीच्या माध्यमातून कचरा डेपोमध्ये नेऊन या कचऱ्याची विल्हेवाट लावण्यात आली आहे.

Edited By : Krushnarav Sathe