आगामी स्थानिक स्वराज्य संस्थांच्या निवडणुकांना अवघे काही महिने शिल्लक असताना राज्यातील राजकीय घडामोडींना वेग आला आहे. राष्ट्रवादी काँग्रेस शरद पवार गटाचे माजी आमदार राजू तिमांडे यांनी आज उपमुख्यमंत्री अजित पवार यांच्या उपस्थितीत राष्ट्रवादी काँग्रेस अजित पवार गटात जाहीर पक्षप्रवेश केला. हिंगणघाट दौऱ्यादरम्यान हा पक्षप्रवेश सोहळा पार पडला.

राजू तिमांडे हे राष्ट्रवादी काँग्रेस शरदचंद्र पवार गटातील माजी आमदार होते. दरम्यान, आज त्यांनी राष्ट्रवादी काँग्रेस अजित पवार गटात पक्षप्रवेश केला आहे. तिमांडे यांच्यासह अनेक कार्यकर्त्यांनी अजित पवार गटात प्रवेश केलाय. अजित पवारांच्या उपस्थित हा पक्षप्रवेश सोहळा पार पडला असून, या पक्षप्रवेश कार्यक्रमाला हजारोच्या संख्येनं कार्यकर्ते उपस्थित होते.

तिमांडे यांच्यासह २,२७५ कार्यकर्त्यांनी अजित पवार गटात पक्षप्रवेश केला आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर तिमांडे यांचा पक्षप्रवेश महत्वाचा ठरला आहे. यामुळे राष्ट्रवादी काँग्रेस अजित पवार गटाची ताकद वाढली असल्याचं बोललं जात आहे. पक्षप्रवेश सोहळ्यानंतर अजित पवार यांच्या हस्ते कृषी उत्पन्न बाजार समितीच्या इमारतीचे लोकार्पण होणार आहे.

विधानसभा निवडणुकीत राजू तिमांडे यांना शरद पवार गटाने उमेदवारी नाकारली होती. यानंतर तिमांडे यांनी विधानसभा निवडणुकीत अपक्ष निवडणूक लढवली होती. दरम्यान, आज त्यांनी शरदचंद्र पवार यांची साथ सोडली. तसेच अजित पवार गटात जाहीर प्रवेश केला. या पक्षप्रवेशामुळे अजित पवार गटाची ताकद वाढली आहे.