बारामती : तीन एप्रिलला पुणे जिल्हा परिषदेचे माजी सदस्य आणि हर्षवर्धन पाटील यांचे निकटवर्तीय मानले जाणारे श्रीमंत ढोले (Srimant Dhole) हे राष्ट्रवादीमध्ये प्रवेश करणार असल्याची माहिती दत्तात्रय भरणे यांनी दिली आहे. 3 एप्रिलला राष्ट्रवादी काँग्रेसचे अध्यक्ष शरद पवार (Sharad Pawar) उपमुख्यमंत्री अजित पवार आणि खासदार सुप्रिया सुळे यांच्या उपस्थितीत श्रीमंत ढोले राष्ट्रवादी काँग्रेस मध्ये प्रवेश करणार आहेत. इंदापूर तालुक्यातील लाखेवाडीत हा पक्ष प्रवेशाचा कार्यक्रम पार पडणार आहे.

इंदापूर (Indapur) तालुक्यातील श्रीमंत ढोले यांचे वर्चस्व असून ढोले हे हर्षवर्धन पाटील (Harshvardhan Patil) यांचे निकटवर्तीय मानले जात होते. पण काही कारणांमुळे त्यांच्यात दुरावा निर्माण झाला आहे. त्यामुळे हर्षवर्धन पाटील यांची साथ सोडून श्रीमंत ढोले हे राष्ट्रवादी काँग्रेसमध्ये प्रवेश करणार आहेत. याआधी हर्षवर्धन पाटील यांचे चुलत बंधू प्रशांत पाटील यांनी उपमुख्यमंत्री अजित पवारांच्या (Ajit Pawar) उपस्थितीत काही महिन्यांपूर्वी राष्ट्रवादीत प्रवेश केला होता. 3 एप्रिलला भाजपचे अनेक कार्यकर्ते राष्ट्रवादी मध्ये प्रवेश करणार असल्याचा दावा दत्तात्रय भरणे यांनी केलाय. हाजाहीर प्रवेशाचा कार्यक्रम 3 तारखेला लाखेवाडीत पार पडणार आहे.

Edited By - Jagdish Patil