मस्साजोगचे सरपंच संतोष देशमुख प्रकरणाला १०० दिवस उलटले. या प्रकरणाचा तपास सुरू असतानाच जळगावात माजी उपसरपंचाची निर्घृण हत्या करण्यात आली आहे. युवराज कोळी असे मृत माजी उपसरपंच यांचे नाव आहे. ते शिवसेना शिंदे गटाचे माजी उपसरपंच असल्याची माहिती गावकऱ्यांनी दिली आहे. गावातीलच तिघांनी आज सकाळी आठ वाजेच्या सुमारास त्यांच्यावर हल्ला केला आहे.

चाकू आणि चॉपरने वार करत त्यांना रक्तबंबाळ केलं. या प्राणघातक हल्ल्यात त्यांचा जागीच मृत्यू झाला आहे. त्यांचा मृतदेह शासकीय व वैद्यकीय महाविद्यालयात आणण्यात आला असून नातेवाईकांनी प्रचंड आक्रोश व्यक्त केला आहे. या प्रकरणानंतर कानसवाडा गावासह जिल्हा रुग्णालयात तणावाचे वातावरण निर्माण झाले आहे. या हत्येमागचे नेमके कारण अद्याप समोर आलेले नाही. पोलीस मारेकऱ्यांचा शोध घेत आहेत.