अभिजीत सोनवणे, साम टीव्ही

नाशिक पोलिसांनी भाजप नेत्यावर मोठी कारवाई केली आहे. नाशिक पोलिसांनी भाजपचा माजी नगरसेवक उद्धव निमसेला अटक केली आहे. राहुल धोत्रे हत्याकांड प्रकरणी पोलिसांनी ही कारवाई केली आहे. या हत्याकांड प्रकरणी निमसेह त्याच्या कार्यकर्त्यांवर आडगाव पोलिसांत गुन्हा नोंदवण्यात आला होता. त्यानंतर आज सोमवारी नाशिक पोलिसांनी ही कारवाई केली.

बैल पोळा सणाच्या दिवशी नाशिकच्या नांदूरनाका परिसरात माजी नगरसेवक उद्धव निमसे आणि धोत्रे गटात जोरदार हाणामारी झाली. यात निमसे गटाने केलेल्या गंभीर मारहाणीत राहुल धोत्रेचा 29 ऑगस्ट रोजी उपचारादरम्यान मृत्यू झाला. या प्रकरणानंतर त्याच्यावर आडगाव नाका पोलीस ठाण्यात (Adgaon Police Station) गुन्हा नोंदवण्यात आला होता.

हत्याकांडानंतर निमसे नाशिकमधून फरार झाला होता. निमसे पोलिसांना घाबरून गुजरात, राजस्थान, आंध्रप्रदेश, दिल्ली आणि कर्नाटक राज्यात प्रवास करत होता. फरार झाल्याने निमसेने पर्यटनस्थळ आणि देवस्थान फक्त अशा ठिकाणी प्रवास केला. त्याने कुठेही हॉटेलमध्ये मुक्काम केला नाही. त्यानंतर निमसे स्वत:हून नाशिकला हजर झाला.

निमसे याच्या ड्रायव्हरने गुजरात एअरपोर्ट सोडल्याची माहिती दिली होती. ट्रॅव्हल बसनेच निमसे याने २० दिवस प्रवास केल्याची माहिती पोलिसांनी दिली. निमसेच्या मागावर ४ पोलीस पथके होती. नाशिक पोलिसांच्या या कारवाईची राजकीय वर्तुळात जोरदार चर्चा रंगली आहे.