Pandharpur Maghi Yatra News : पंढरपुरात (Pandharpur) माघी वारी यात्रेसाठी आलेल्या 137 भाविकांना अन्नातून विषबाधा झाली. हे सर्व भाविक (devotees) नांदेड जिल्ह्यातील आहेत. सर्व भाविकांची प्रकृती स्थिर असल्याचे डाॅक्टरांनी (doctor) सांगितले आहे. दरम्यान ज्या दुकानातून भाविकांना माल खरेदी केला हाेता. तेथे जाऊन अन्न व औषध प्रशासनाच्या पथकाने भगर आणि खाद्य तेलाचा साठा जप्त केला आहे.

विठुरायाच्या (vitthal) दर्शनासाठी आलेल्या नांदेड जिल्ह्यातील भाविकांनी शहरातील स्टेशन रोडवरील एका दुकानातून माल खरेदी केला हाेता. अन्न व औषध प्रशासनाने आज (गुरुवार) या दुकानाची तपासणी केली. तपासणी दरम्यान दुकानातील आठ हजार 850 रूपये किंमतीची 118 किलो भगर आणि 23 हजार 370 रूपये किंमतीचे 123 लिटर खाद्य तेल असा एकूण 32 हजार 220 रुपये किंमतीचा साठा पथकाने जप्त केला‌.

संबंधित दुकानातील भगर आणि खाद्य तेलाचे नमुने घेतले आहेत. ते पुणे येथील‌ प्रयोग शाळेत तपासणीसाठी पाठवले आहेत. तपासणीचा अहवाल आल्यानंतर पुढील कारवाई केली जाईल असे अन्न व औषध विभागाचे उपायुक्त सुनील जिंतूरकर यांनी साम टीव्हीशी बाेलताना सांगितले. दरम्यान सर्व भाविकांची प्रकृती स्थिर असल्याची माहिती रुग्णालयातून देण्यात आली.

Edited By : Siddharth Latkar