बालाजी सुरवसे, साम टीव्ही, प्रतिनिधी

जन्मदात्या बापानेच कुऱ्हाडीचे घाव घालत पोटच्या मुलीचा खून केल्याचा धक्कादायक प्रकार धाराशिवमध्ये घडला आहे. आरोपीने मुलीची हत्या करुन तिचा मृतदेह २४ तास घरात ठेवला होता. या प्रकरणी धाराशिवमधील आंबी पोलीस ठाण्यात गुन्हा दाखल करण्यात आला आहे. पोलिसांनी आरोपीला बेड्या ठोकल्या आहेत.

धाराशिव जिल्ह्यातील परंडा तालुक्याच्या माणिकनगर शेळगाव येथे हा भीषण प्रकार घडला आहे. मुलगी सतत आजारी पडत असल्याने आणि ती सायकलवरुन खाली पडल्याने रागाच्या भरात आरोपीने कुऱ्हाडीचे घाव घालत त्याच्या मुलीची हत्या केली. हत्येच्या वेळी आरोपी दारुच्या नशेमध्ये असल्याची माहिती समोर आली आहे.

मिळालेल्या माहितीनुसार, ज्ञानेश्वर महादेव जाधव या व्यक्तीने त्याच्या नऊ वर्षांच्या मुलीला संपवले. त्याने कुऱ्हाडीने घाव घालत मुलीची हत्या केली. त्यानंतर मुलीचा मृतदेह तब्बल २४ तास घरातच ठेवला. या प्रकरणाची माहिती मिळताच पोलिसांनी घटनास्थळी पोहोचत आरोपीला अटक केली. आंबी पोलीस ठाण्यात आरोपीच्या विरोधात गुन्हा दाखल करण्यात आला आहे.

लातूरमध्ये बापाने पोटच्या लेकीचा जीव घेतला.

लातूरच्या उदगीर तालुक्यातील भीमा तांडा येथे एका व्यक्तीने चार वर्षांच्या मुलीची गळफास देत हत्या केली. चॉकलेटसाठी पैसे मागितल्याच्या रागात या व्यक्तीने पोटच्या लेकीचा जीव घेतला. या प्रकरणी उदगीर ग्रामीण पोलीस ठाण्यात आरोपी बालाजी राठोड विरोधात गुन्हा दाखल करण्यात आला आहे. या प्रकरणामुळे परिसरात खळबळ उडाली आहे.