जळगावमधून हृदयद्रावक घटना समोर आली आहे. विजेचा धक्का लागून बाप लेकीचा दुर्दैवी मृत्यू झाला. तर एक जण गंभीर जखमी झाल्याची घटना घडली आहे. घराच्या छतावर कपडे वाळत घालत असताना उच्च दाबाच्या वीज वाहक तारेला स्पर्श झाल्याने ही घटना घडली. मृतांमध्ये मुस्लिम धर्मगुरू शब्बीर खान आणि त्यांची मुलगी आलिया खान अशी नावे समोर आली असून जखमी तरुणीवर रुग्णालयात दाखल करण्यात आले आहे.

मिळालेल्या माहितीनुसार, सदर घटना जळगाव शहरातील अक्सा नगर येथे घडली आहे. मृत आलिया ही घराच्या छतावर कपडे वाळत घालण्यासाठी गेली होती. कपडे वाळत घालत असताना तिला बाजूला असलेल्या उच्च दाबाच्या वीज वाहक तारेला तिचा हात लागला.

विजेचा शॉक लागल्याने ती जागीच चिकटली. आलियाला विजेच्या खांबाला चिकटलेलं पाहून तिच्या वडिलांनी धाव घेतली.आलियाला सोडवण्यासाठी गेलेल्या तिच्या वडिलांना देखील विजेचा शॉक लागला. या दुर्घटनेत दोघांचाही जागीच मृत्यू झाला. तर या दोघांना सोडवायला गेलेली शब्बीर खान यांची भाची मारिया खान ही गंभीर जखमी झाली.

दरम्यान मारिया हिला रुग्णालयात दाखल करण्यात आले आहे. तिच्यावर उपचार सुरु करण्यात आले आहे. मात्र तिची प्रकृती गंभीर असल्याचं म्हटलं जात आहे. या घटनेनंतर खान कुटुंबियांवर दुःखाचा डोंगर कोसळला आहे. तसेच गावकऱ्यांनी देखील हळ हळ व्यक्त केली जात आहे.