पराग ढोबळे, साम टीव्ही

बच्चू कडू यांच्या नेतृत्वातील मोर्च्यातील शेतकऱ्यांनी आक्रमक भूमिका घेतली आहे. कर्जमाफीसाठी हजारो शेतकरी नागपुरात ठाण मांडून बसले आहेत. शेतकरी कर्जमाफीसाठी उद्या बच्चू कडू यांची मुख्यमंत्री देवेंद्र फडणवीस यांच्यासोबत बैठक होणार आहे. शेतकऱ्यांना कर्जमाफी दिली नाही तर ३१ तारखेला रेल्वे बंद करू, असा इशारा माजी मंत्री बच्चू कडू यांनी फडणवीस सरकारला दिला आहे.

माजी मंत्री बच्चू कडू हे हजारो शेतकऱ्यांच्या आंदोलनाचं नेतृत्व करत नागपुरात पोहोचले आहेत. त्यांनी नागपुरात शेतकरी कर्जमाफीचा मुद्दा लावून धरला आहे. त्यांनी थेट रस्त्यावरच आंदोलनाला सुरुवात केली आहे. या मोर्चात शेतकऱ्यांशी संवाद साधताना फडणवीस सरकारला रेल्वे बंद करू, असा इशारा दिला.

'कर्जमाफीची तारीख मिळाल्याशिवाय शेतकऱ्यांनी घरी जाऊ नये, असंही बच्चू कडू यांनी शेतकऱ्यांना संदेश दिला आहे. एका बातमीवरुन न्यायालयाने आदेश दिले. मात्र शेतकरी रोज मरत आहे. त्याचा विचार कोणी करत नाही. आम्ही हटायला तयार आहे, मात्र पोलिसांनी आम्हाला जेलमध्ये न्यावे. पोलिसांनी जेलमध्ये व्यवस्था करावी, आम्ही न्यायालयाचा मान ठेवून जायला तयार आहे, असेही त्यांनी सांगितले.

बच्चू कडू करणार मुख्यमंत्र्यांशी चर्चा

बच्चू कडू यांची मुख्यमंत्र्यांसोबत कर्जमाफीसह इतर मुद्द्यावर उद्या बैठक होणार आहे. मात्र, आंदोलन मात्र सुरूच राहणार आहे. या बैठकीत सकारात्मक निर्णय न झाल्यास 31 तारखेला रेल रोको आंदोलन करण्याचा इशारा बच्चू कडू यांनी सरकारला दिला आहे.

मनोज जरांगे पाटील यांचं बच्चू कडू यांना समर्थन

मनोज जरांगे पाटील बच्चू कडूंना समर्थन देण्यासाठी नागपूरला रवाना झाले आहेत. मराठा आंदोलक मनोज जरांगे पाटील बच्चू कडू यांच्या आंदोलनात सहभागी होणार आहेत. जालन्यातील महाकाळा येथील राहत्या घरून मनोज जारंगे पाटील हे नागपूरच्या दिशेने रवाना झाले आहेत.