तबरेज शेख

नाशिक - बिबट्याच्या हल्ल्यात शेतमजूर ठार झाल्याची घटना तालुक्यातील गिरणारे येथे घडली आहे. गेल्या दाेन तीन दिवसांपासून हा मजूर बेपत्ता हाेता. मात्र, साेमवारी शेतातील उसाच्या मळ्यात त्याचा मृतदेह आढळून आला.अरुण हिरामण गवळी असे मृत्यू झालेल्या विकतचे नाव आहे. या भागात पुन्हा शेतमजुरावर बिबट्याने झडप घेत फडशा पाडल्याने परिसरात खळबळ माजली आहे. महिनाभरानंतर बिबट्याच्या हल्ल्यात हा दुसरा बळी गेला आहे.

हे देखील पाहा -

हरसूल येथील रहिवाशी असलेले शेतमजूर गिरणारे पंचक्रोशीत रोजंदारीने शेतीच्या कामासाठी मुक्कामी स्थलांतरीत झाले आहेत. येथील टमाटा मार्केटच्या मागे असलेल्या ऊसाच्या शेतात बिबट्याने अरुण गवळी या मजुरावर दोन दिवसांपुर्वी हल्ला केला. या हल्ल्यात अरूणचा मृत्यू झाला. तो दोन दिवसांपासून बेपत्ता असल्यामुळे सर्वच त्याला शोधत होते.

दरम्यान, साेमवारी सकाळी येथील शेतात कुजलेल्या अवस्थेत मृतदेह आढळून आला. या घटनेची माहिती कळताच वनपरिक्षेत्र आधिकारी विवेक भदाणे, ग्रामीण पोलीस, वनपथक घटनास्थळी दाखल झाले. अन्य शेतमजुरांनी हा मृतदेह अरूणचा असल्याचे ओळखले. पोलीस, वनविभागाने पंचनामा करत मृतदेह शवविच्छेदनासाठी जिल्हा रुग्णालयात पाठविण्यात आला आहे.

Edited By - Shivani Tichkule