अध्यात्म आणि दैवी शक्तीच्या नावाखाली लोकांच्या भावनांशी खेळणाऱ्या भोंदूबाबा अशोक खरातचे काळे कारनामे आता हळू हळू समोर येऊ लागलेत...विधीच्या नावाखाली महिलांवर अत्य़ाचार करणारा हा भोंदूबाबा... संमोहन आणि अघोरी विधीच्या नावाखाली भक्तांना तो हातोहात फसवतं होता. भक्तांकडून पैसे उकळण्यासाठी खरात नेमके काय फंडे वापरत होता पाहूयात...

खरातकडून भक्तांसमोर नकली साप आणि वाघाची कातडी ठेवून भीतीचं वातावरण निर्माण केलं जायचं. वशीकरणासाठी 20 फुटी नागाचा वापर खरातनं केला... तंत्र- मंत्र करत खरात नागाला बोलवायचा आणि नागाला वश केल्याची बतावणी करायचा.. विशेष म्हणजे खरात या नकली नागाच्या हालचालींवर रिमोट कंट्रोलनं नियंत्रण ठेवायचा.. एवढंच नाही तर बाजारात स्वस्त मिळणारे रानटी चिंचोके पॉलिश करून ते खडे म्हणून विकायचा. 100 रुपयांचे हे चिंचोके भक्तांच्या आर्थिक परिस्थितीनुसार 10 हजार ते 1 लाखांपर्यंत विकायचा. हे खडे आणि रत्न दैवी असल्याचा दावाही खरात भक्तांसमोर करायचा...त्याचबरोबर संतती प्राप्तीसाठी वेगवेगळ्या प्राण्याची कातडी भक्तांना दिल्याचाही आरोप खरातवर करण्यात आलाय..

नाशिक पोलिसांनी भोंदू खरातला ताब्यात घेऊन 5 दिवस उलटले, सलग केलेल्या तपासात त्याच्या काळ्या कारनाम्याची यादी पाहिली तर गरगरायला होतं. निष्पापांना घाबरवून, राजकीय दबाव वापरून, वासनांध विकृतीचा हा गोरखधंदा कित्येक वर्ष खुल्लेआम सुरु होता. खरात सारख्या भोंदूवर सहज विश्वास ठेवून त्याला भुलणाऱ्या भक्तानी माणसात देव शोधण्याच्या नादात समाजात दानवांना थारा देऊ नये इतकंच.