सोलापूर : अज्ञात कारणाने वृद्ध शेतकरी दाम्पत्याने विषारी कीटकनाशक प्राशन करून आत्महत्या केल्याची खळबळजनक घटना उघडकीस आली आहे. पोपट बाबूराव मुळे (वय- ६५ वर्षे), आणि सौ.कमल पोपट मुळे (वय- ५६ वर्षे , दोघे रा. खंडाळी ता. मोहोळ) अशी आत्महत्या केलेल्या पति- पत्नीचे नाव आहे. या घटनेची नोंद मोहोळ पोलिसात करण्यात आली आहे.

याबाबत पोलिसांकडून मिळालेल्या माहितीनुसार, पोपट बाबूराव मुळे, आणि कमल पोपट मुळे हे पती- पत्नी गुरुवारी दुपारी ४ ते ५ वाजेच्या दरम्यान अज्ञात कारणाने घरामधून निघून गेले होते. यामुळे त्यांचा मुलगा अमर मुळे आणि चुलत भाऊ बाळू मुळे यांनी सर्वत्र शोध घेण्यास सुरवात केली. मात्र, ते कुठेच मिळूून आले नाहीत.

हे देखील पहा-

दरम्यान, शुक्रवारी सकाळी हे दोघे पती- पत्नी शेतात टोमॅटोच्या पिका शेजारी असणाऱ्या लिंबाच्या झाडाखाली झोपलेल्या अवस्थेत आढळून आले. जवळ जाऊन बघितलं असत, त्यांच्या तोंडाला फेस येऊन ते दोघे मृत झाले होते. घटनास्थळी कसल्या तरी कीटकनाशकाचा उग्र वास येत असल्यामुळे त्या दोघांनी अज्ञात कारणाने घरातून निघून जाऊन आत्महत्या केली असावी, अशी नातेवाईकांनमधून शंका व्यक्त करण्यात येत आहे.

या प्रकरणी बाळू केरू मुळे यांनी मोहोळ पोलिसात दिलेल्या माहितीवरून अकस्मात मृत्यूची नोंद करण्यात आली आहे. या घटनेचा पुढील तपास पोलीस नाईक चंद्रकांत आदलिंगे हे करत आहेत. मात्र, या वृद्ध दाम्पत्याने नेमक्या कोणत्या कारणामुळे विषारी कीटकनाशक प्राशन करून आत्महत्या केली. हे अद्याप समजू शकले नाही. यामुळे या आत्महत्या प्रकरणाचे गूढ वाढले आहेत. या दुर्दैवी घटनेमुळे खंडाळी सह परिसरात मोठ्या प्रमाणात हळहळ व्यक्त केली जात आहे.

Edited By- Digambar Jadhav