महायुतीतील घटक पक्ष असलेल्या शिवसेनेचे एकनाथ शिंदे आणि भाजपचे मंत्री असलेल्या गणेश नाईकांमध्ये मानापमान नाट्याचा दुसरा अंक पाहायला मिळाला. 10 दिवसात दोनदा उपमुख्यमंत्री एकनाथ शिंदेंना डावलल्याचा आरोप करत शिंदेसेना संतप्त झाली. या वादाला कारण ठरली ही निमंत्रण पत्रिका

ही निमंत्रण पत्रिका पाहा, नवी मुंबईतल्या आरोग्य सेवांच्या लोकार्पण सोहळ्याच्या कार्यक्रम पत्रिकेतून उपमुख्यमंत्री एकनाथ शिंदेंचं नाव वगळण्यात आलंय. या पत्रिकेत वनमंत्री गणेश नाईक, खासदार श्रीकांत शिंदे आणि नरेश म्हस्के यांची नावं आहेत. मात्र, जिल्ह्याचे पालकमंत्री असूनही उपमुख्यमंत्री एकनाथ शिंदेंचं नाव गायब असल्यानं नवी मुंबईत शिंदेसेना आणि नाईकांमधील जुना वाद पुन्हा नव्यानं पेटला. यावेळी शिंदेगटाच्या कार्यकर्त्यांनी थेट वनमंत्री गणेश नाईक यांची गाडी अडवून त्यांना रोखण्याचा प्रयत्न करत घडल्या प्रकाराचा निषेध केलाय. तर महापौरांनी निमंत्रण पत्रिकेचं समर्थन केलंय.

विशेष म्हणजे भाजपच्याच आमदार मंदा म्हात्रेंनीही शिंदेंची पाठराखण करत नाईकांवर आगपाखड केली. तर नाईकांनीही तेवढ्याच आक्रमकपणे त्यांना प्रत्युत्तर दिलंय. या दोन्ही नेत्यांमधील शह कटशहांची पार्श्वभूमी विसरुन चालणार नाही. 2022 पासून शिंदेसेना भाजपसोबत असली तर गणेश नाईक आणि एकनाथ शिंदेंमध्ये धुमसत असलेला वाद काही शमलेला नाही. पाहा या आधी या २ नेत्यांमध्ये झालेल्या वादाच्या घटना...

जून 2026

नवी मुंबई आंतरराष्ट्रीय विमानतळावरील छत्रपती शिवाजी महाराजांच्या पुतळा अनावरण कार्यक्रमाच्या निमंत्रण पत्रिकेत उपमुख्यमंत्री एकनाथ शिंदेंचे नाव वगळलं.

मार्च 2026

गणेश नाईक नवी मुंबईपुरते मर्यादित नेते म्हणत खासदार श्रीकांत शिंदेंची गणेश नाईकांवर टिका.

नोव्हेंबर 2025

नवी मुंबई महापालिकेत 14 गावांच्या समावेशाच्या एकनाथ शिंदेच्या निर्णयाला गणेश नाईकांकडून जोरदार विरोध

फेब्रुवारी 2025

शिंदेंना शह देण्यासाठी गणेश नाईक यांचे नवी मुंबई सोडून ठाण्यात जनता दरबारचं आयोजन

हा वाद केवळ निमंत्रण पत्रिकेपुरता मर्यादित नाही. हा संघर्ष आहे नवी मुंबईतील राजकीय वर्चस्वाचा. एकीकडे ठाणे जिल्ह्यात आनंद दिघेंनंतर एकनाथ शिंदेंनी एकहाती नेतृत्व निर्माण केलं. तर दुसरीकडे नवी मुंबईत गणेश नाईक आजही किंगमेकरच्या भूमिकेत राहिलेत. त्यामुळे नवी मुंबईत शिंदेंचा विस्तार आणि नाईकांचा प्रभाव यांच्यातील संघर्ष वेळोवेळी पाहायला मिळाला.