अभिजित देशमुख 
डोंबिवली : बेशिस्त आणि प्रवाशांच्या जीवाशी खेळ करणाऱ्या रिक्षा चालकांवर वाहतूक पोलिसांनी कारवाईचा बडगा उगारला आहे. मागील सहा महिन्यांत डोंबिवलीतील रिक्षा चालकांकडे गणवेश, परवाना, नामपट्टी, रिक्षांचे आयुर्मान संपल्यानंतरही रिक्षा चालवत असलेल्या आणि रिक्षात नियमापेक्षा जास्त सीट बसविले जात आहेत. अशा पाच हजार पेक्षा अधिक रिक्षा चालकांवर दंडात्मक कारवाई करण्यात आली आहे.  

डोंबिवली शहर परिसरात बेशिस्तीने प्रवासी वाहतूक करणाऱ्या पाच हजाराहून अधिक रिक्षा चालकांवर गेल्या सहा महिन्याच्या कालावधीत दंडात्मक कारवाई करण्यात आली आहे. रिक्षांमध्ये फक्त तीन प्रवाशांसाठी परवानगी असूनही अनेक चालक जादा पैसे कमावण्यासाठी चालकाच्या आसनाजवळही प्रवासी बसवत चौथी सीट घेऊन वाहतूक करतात. जो प्रवासी आणि वाहन दोघांच्या सुरक्षेला धोका ठरतो. 

नियम मोडणाऱ्यांवर दंडात्मक कारवाई 

धोकादायक प्रवास थांबावा; यासाठी डोंबिवली वाहतूक पोलिसानी फडके रस्त्यावरून शेलार नाका, टिळक रस्ता, आयरे रोड, मानपाडा परिसरापर्यंत अनेक ठिकाणी विशेष मोहीम राबवून नियमभंग करणाऱ्या रिक्षा चालकांवर कारवाईचा बडगा उगारला आहे. या कारवाईत गणवेश नसलेले रिक्षाचालक, परवाना वा नामपट्टी नसलेले, तर काही रिक्षांचे आयुर्मान संपलेले आणि चौथी सीट बसविणाऱ्या रिक्षा चालकावर मोटर वाहन कायद्यानुसार ई-चालानद्वारे दंड आकारण्यात आले. 

तर आता परवाना, बॅच रद्दची कारवाई 

वाहतूक पोलिसांच्या रडारवर चौथी सीट बसविणारे रिक्षा चालकावर आहेत. रिक्षा चालक चौथी सीट प्रवासी आणि रिक्षा चालक दोघांच्या सुरक्षेला धोका निर्माण करत आहेत. यामुळे नागरिकांना आणि रिक्षा चालकांना नियम पाळण्याचे आवाहन केले असून यापुढे नियम मोडणाऱ्या रिक्षा चालकांचे परवाने व बॅच रद्द करण्याचा इशारा वाहतूक विभागाचे वरिष्ठ पोलीस निरीक्षक श्रीराम पाटील यांनी दिला आहे.