रामनाथ ढाकणे, साम टीव्ही छत्रपती संभाजीनगर
पतीच्या त्रासाला कंटाळून एका 26 वर्षीय महिला डॉक्टरने गळफास घेऊन आपली जीवनयात्रा संपवली. ही दुर्दैवी घटना छत्रपती संभाजीनगर शहरातील बजरंग चौक परिसरात शनिवारी (ता 24) घडली. प्रतीक्षा प्रीतम गवारे (वय 24) असं मृत महिलेचे नाव आहे. याप्रकरणी सिडको पोलीस ठाण्यात आकस्मित मृत्यूची नोंद करण्यात आली आहे.
मिळालेल्या माहितीनुसार, अवघ्या 4 महिन्यांपूर्वीच प्रतीक्षाचा विवाह प्रीतम गरवारे या तरुणासोबत झाला होता. काही दिवसांच्या सुखी संसारानंतर दोघांमध्ये वाद होऊ लागले. चारित्र्यावर संशय घेऊन पती आपला मानसिक छळ करत असल्याची तक्रार प्रतीक्षाने तिच्या आई-वडिलांकडे केली होती.
तसेच माहेरून हुंड्याचे पैसे आणि फर्निचर साठी पैसे आणण्याचा पतीकडून तगादा लावला जात असल्याचा आरोप प्रतीक्षाने केला होता. दोघांमधील वादात कुटुंबियांनी मध्यस्थी देखील केली. मात्र, तरी देखील त्यांचे खटके उडतच होते.
दरम्यान, शनिवारी प्रतीक्षा आणि तिच्या पतीमध्ये पुन्हा वाद झाला. या वादानंतर तिचा पती बाहेर निघून गेला. यानंतर प्रतीक्षाने राहत्या घरी गळफास घेऊन आपली जीवनयात्रा संपवली. महत्त्वाचं म्हणजे मृत्यूपूर्वी पतीला फोन करून घरी बोलावले. मात्र, तो येण्यापूर्वीच तिने गळफास घेतलेला होता. याप्रकरणी सिडको पोलीस ठाण्यात आकस्मित मृत्यूची नोंद करण्यात आली आहे. सध्या पोलीस घटनेचा तपास करीत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.