अकोला : अकोला महानगरपालिकेच्या अंतर्गत आकारण्यात येणाऱ्या घर करावरील शास्ती रद्द करावी या मागणीसाठी शिवसेनेचे महापालिका गटनेते राजेश मिश्रा यांनी महानगरपालिकेमधून सुरु असणाऱ्या ऑनलाईन सर्वसाधारण सभेच्या ठिकाणी येऊन आयुक्तांकडे व महापौरांकडे शास्ती रद्द करण्याची जोरादार मागणी केली.

हे देखील पहा -

यावर प्रभारी आयुक्त निमा अरोरा यांनी मागील सभेत या विषयावर निर्णय घेऊन ती एक महिन्यासाठी देण्यात आली होती. परंतु, आता त्यामध्ये वाढ करता येत नाही. त्यामुळे शास्ती रद्द करता येत नाही, असे राजेश मिश्रा यांच्यासह नगरसेवकांना सांगितले. त्यांच्या या विधानावर शिवसेनेच्या नगरसेवकांनी तीव्र नाराजी व्यक्त करीत ऑनलाईन सभेसाठी सुरु असलेली उपकरणे बंद केली.

मात्र, सभेत उपस्थित असलेल्या पोलिसांनी नगरसेवकांना सभेतून बाहेर काढण्याचा प्रयत्न केला. त्यावेळी शिवसेनेच्या नगरसेवकांनी पोलिसांना विरोध केला. शेवटी, महापौर आणि आयुक्त यांनी सेनेच्या नगरसेवकांना शांत राहण्याची सूचना केली. मात्र, ते ऐकत नसल्याने चिडलेल्या महापौर अर्चना मसने यांनी शिवसेनेच्या आठ नगरसेवक आणि राष्ट्रवादी काँग्रेसचे नगरसेवक रहीम पेंटर यांना एका सभेसाठी निलंबित केले.

Edited By : Krushnarav Sathe