आगामी स्थानिक स्वराज्य संस्थांच्या निवडणुकांच्या पार्श्वभूमीवर नेत्यांकडून जोरदार तयारी सुरू आहे. राज्यातील प्रत्येक पक्ष आपली घडी मजबूत करण्याच्या प्रयत्नात आहे. प्रत्येक तालुक्यांमध्ये राजकीय उलथापालथ पाहायला मिळत आहे. अशातच सोलापुरातही राजकीय वारे वेगाने वाहू लागले आहेत. काँग्रेसचे माजी आमदार दिलीप माने यांनी भाजपचं कमळ हाती घेणार असल्याचं निश्चित केलं आहे. या पक्षप्रवेशामुळे काँग्रेसला मोठा धक्का बसणार आहे.

अलिकडेच सोलापूर कृषी उत्पन्न बाजार समितीचे अध्यक्ष दिलीप माने, यशवंत माने, राजन पाटील आणि बबनराव शिंदे यांचे चिरंजीव रणजीत आणि विक्रम शिंदे आदींनी मुंबईत मुख्यमंत्री देवेंद्र फडणवीस यांची भेट घेतली होती. या भेटीनंतर दिलीप माने यांचा भाजप प्रवेश निश्चित असल्याची चर्चा सुरू झाली.

मिळालेल्या माहितीनुसार, भाजपने सोलापुरात ऑपरेशन लोटस सुरू केलं आहे. सोलापूर जिल्ह्यातील चार माजी आमदारांनी गुरूवारी मुख्यमंत्र्यांची निवासस्थानी भेट घेतली. माजी आमदार लवकरच भाजपमध्ये प्रवेश करणार का? अशी चर्चा रंगली होती. दिलीप माने यांनी या चर्चांना पूर्णविराम दिला आहे. त्यांनी भाजपमध्ये प्रवेश करत असल्याचं जाहीर केलं.

हा पक्षप्रवेश सोहळा दिवाळीनंतर भाजप कार्यलयात पार पडणार आहे. प्रवेशनंतर सोलापुरात कार्यकर्त्यांचा मेळावा पार पडेल, अशी माहिती समोर आली आहे. कार्यकर्त्यांसोबत बैठक घेऊन दिलीप माने काँग्रेसला जय महाराष्ट्र करणार असल्याचं सांगितलं. दिवाळीनंतर दिलीप माने भाजपचं कमळ हाती घेणार आहेत. आगामी स्थानिक स्वराज्य संस्थांच्या निवडणुकांच्या पार्श्वभूमीवर दिलीप माने यांनी काँग्रेसची साथ सोडल्यामुळे पक्षाला मोठा धक्का बसला आहे.