धुळे : जिल्‍हा परिषद व पंचायत समितीच्‍या पोट निवडणुकीचा निकाल जाहीर झाला. या निकालानंतर विजयाचा गुलाल उधळला. गुलाल उधळून झाल्यानंतर शिरपूर व नगाव येथील भाजपच्या दोन विजयी उमेदवारांवर संबंधित पोलिस ठाण्यांमध्ये विविध कलमान्वये गुन्हा दाखल करण्यात आला आहे. (dhule-news-zilha-parishad-election-win-two-bjp-candidate-police-fir)

पोट निवडणुकीत विजय मिळविल्‍यानंतर विजयाचा जल्लोष साजरा करत असताना शिरपूर तालुक्यातील शिंगावे गणातील भाजपचे विजयी झालेले उमेदवार चंद्रकांत पाटील यांच्या कार्यकर्त्यांतर्फे जल्लोष साजरा केला. पराजित उमेदवारांसोबत कार्यकर्त्यांमध्ये झालेल्या राड्यानंतर विजयी उमेदवार चंद्रकांत पाटील यांच्यासह दहा जणांवर शिरपूर पोलिस ठाण्यात गुन्हा दाखल करण्यात आला आहे.

महिला उमेदवाराकडे बघून अर्वाच्य भाषेत चाळे

दुसरीकडे धुळे तालुक्यातील नगाव येथील विजयी उमेदवार राम भदाणे यांचा देखील विजयी जल्लोष सुरू असताना पराजित झालेल्या विरोधी गटातील महिला उमेदवाराकडे बघून अर्वाच्य व अश्लील चाळे केल्याबद्दल देवपूर पोलिस ठाण्यात विजय उमेदवाराच्या विरोधात गुन्हा दाखल करण्यात आला आहे. विजयाचा गुलाल उतरेपर्यंत धुळे जिल्ह्यातील भाजपच्या 2 विजयी उमेदवारांवर गुन्हे दाखल झाल्याने राजकीय वातावरणात खळबळ उडाली आहे.