Dhule - Shirpur : धुळे जिल्ह्यातून अपघाताची एक भयंकर घटना समोर आली आहे. भरधाव वेगात येणाऱ्या ट्रकचे अचानक समोरील टायर फुटले. त्यानंतर ट्रक अनियंत्रित झाला. त्याने थेट समोरील क्रुझरला धडक दिली. धडक इतकी भीषण होती. ट्रक थेट तापी नदीपात्रात कोसळला. सोमवारी (२३ जानेवारी) रात्री साडेनऊ वाजेच्या सुमारास ही घटना घडली. (Breaking Marathi News)

या भीषण अपघातात क्रुझरमधील २० ते २५ जण जखमी झाल्याची माहिती आहे. धुळे (Dhule) जिल्ह्यातील शिरपूर शिवारात हा अपघात झाला आहे. अपघाताची माहिती मिळताच, पोलिसांसह स्थानिक नागरिकांनी घटनास्थळी धाव घेत बचावकार्य सुरू केलं आहे.

अपघातातील जखमींना उपचारासाठी तातडीने जवळच्या रुग्णालयात दाखल करण्यात आलं आहे. रात्रीची वेळ आणि अंधार असल्याने बचावकार्यात मोठी अडचण येत आहे. त्यातच तापी नदीला मोठ्या प्रमाणात पाणी असल्याने ट्रकमधील चालक वाहकांना शोधण्याचं काम सुरू आहे. ट्रकमध्ये किती जण होते. याची माहिती अद्यापही समोर आलेली नाही.

प्राप्त माहितीनुसार, अपघातग्रस्त (Accident) क्रुझर शिरपूरच्या दिशेने जात होती. त्याचवेळी भरधाव ट्रकही त्याच दिशेने जात होता. दरम्यान, दोन्ही वाहने तापी नदीच्या पूलावर आली असता, अचानक ट्रकचे समोरील टायर फुटले आणि ट्रकने थेट समोरील क्रुझरला धडक दिली.

या भीषण अपघातात २० ते २५ जण जखमी झाले. तर ट्रकमधील चालक-क्लिनर पाण्यात बुडाले. दरम्यान, अपघाताची माहिती मिळताच स्थानिक नागरिकांनी घटनास्थळी धाव घेतली. पोलिसांनी (police) नागरिकांच्या मदतीने जखमी झालेल्या प्रवाशांना उपचारासाठी रुग्णालयात दाखल केलं आहे. जखमींपैकी १० ते १५ जणांची प्रकृती चिंताजनक असल्याची माहिती आहे.

Edited By - Satish Daud