धुळे : धुळे शहरातील प्रभाग क्रमांक 19 येथील वडजाई रोड परिसरामध्ये गेल्या कित्येक महिन्यांपासून वीज वितरण (MSEDCL) विभागाच्या गलथान कारभार सुरू आहे. नागरीकांचे समाधान कर्मचाऱ्यांकडून होत नाही. यामुळे संतप्‍त झालेल्‍या नागरीकांनी आज लोकप्रतिनिधींसमवेत संबंधित अधिकाऱ्यांना घेराव घातला. (Maharashtra News)

धुळे (Dhule) शहरातील प्रभाग १९ मध्‍ये दिवसातून आठ ते दहा तास वीज नसल्याने त्रास सहन करावा लागत आहे. या संदर्भात कार्यालयमध्ये (Mahavitaran) कुठलाही अधिकारी वेळेवर हजर राहत नसून कुठल्याही प्रकारे फोन देखील उचलले जात नाही. यामुळे संतप्त नागरिकांनी लोकप्रतिनिधींकडे तक्रार केली होती. यानंतर प्रभागातील चारही नगरसेवकांनी तसेच परिसरातील नागरिकांतर्फे संबंधित अधिकाऱ्यांना घेराव घालत या संदर्भातील जाब विचारला आहे.

विजेचा लपंडाव नेहमीच सुरू असल्यामुळे या परिसरातील नागरिकांना त्याचबरोबर विजेवर आधारित व्यवसायिकांना याचा मोठा फटका सहन करावा लागत आहे. वीर वितरण अधिकाऱ्यांतर्फे कुठल्याही प्रकारची उपाययोजना केली जात नसल्यामुळे नागरिकांचा संताप अनावर झाला असून संबंधित अधिकाऱ्यांना घेराव घालत संतप्त नागरिकांनी व लोकप्रतिनिधींनी संबंधित अधिकाऱ्यांची झाडाझडती घेतली आहे. यावेळी नागरिकांसह लोकप्रतिनिधी देखील चांगलेच संतापलले बघावयास मिळाले आहे. याबाबत अधिकाऱ्यांनी लवकरात लवकर उपाययोजना करण्याचे आश्वासन संतप्त नागरिकांसह लोकप्रतिनिधींना दिले आहे.