धुळे : मुंबईमधील तळोदा येथून काही दिवसांपूर्वी आठ महिन्यांच्या बाळाचे अपहरण करण्यात आल्याची घटना घडली होती. या प्रकरणी पोलिसांकडून तपास सुरु असताना धुळे जिल्ह्यातील शिरपूर येथे एका दारूच्या नशेत फिरत असलेल्या संशयित महिलेला पोलिसांनी ताब्यात घेत तिच्याकडून बाळाची सुखरूप सुटका केली आहे. 

धुळे (Dhule) जिल्ह्यातील शिरपूर येथील रस्त्यावर बाळाला सोबत घेऊन फिरत असलेल्या मद्यपी महिलेवर पोलिसांची नजर गेल्यावर तिच्यावर संशय आला. यामुळे तिला पोलिसांनी ताब्यात घेत चौकशी केली असता तिने उडवाउडवीचे उत्तरे दिली. त्यानंतर तिने तिचे नाव व सांगितलेला सर्व पत्ता खोटा असल्याचे पोलीस (Police) तपासात निष्पन्न झाला. या नंतर पोलिसांनी यासंदर्भात बाळाचा फोटो सर्वत्र व्हायरल केल्यानंतर सदर बाळ हे मुंबई (Mumbai) येथील तळोदा येथून काही दिवसांपूर्वी त्याचे अपहरण झाल्याचे उघडकीस आले.  

पोलिसांनी या बाळाची मद्यपी महिलेकडून सुखरूप सुटका केली असून त्याच्या आई- वडिलांचा तपास सुरु आहे. आई- वडिलांची सर्व चाचपणी झाल्यानंतर या बाळाला त्यांच्या स्वाधीन करण्यात येणार आहे. पोलिसांनी दाखवलेल्या तत्परतेमुळे या बाळाचा जीव वाचला असून, या निमित्ताने मुलं पळवणारी टोळी सक्रिय असल्याचा संशय मात्र बळावला आहे.