चिमठाणे (धुळे) : चिमठाणे (ता. शिंदखेडा) येथील रहिवासी प्रवीण विजय गवते (वय ४०) याने सुकवद- गिधाडे रस्त्यावरील तापी पुलावरून सुलवाडे धरणात उडी घेऊन (Dhule News) आत्महत्या केल्याची घटना घडली. शिंदखेडा (Shindkheda) पोलिस ठाण्यात मृताच्या साडूने दिलेल्या खबरीनुसार आकस्मिक मृत्यूची नोंद करण्यात आली आहे. (Live Marathi News)

मृत प्रवीण गवते यांचे साडू नितीन विश्राम सांगळे यांनी शिंदखेडा पोलिस ठाण्यात दिलेल्या माहितीनुसार लहान साडू प्रवीण गवते वीज वितरण कंपनीत (MSEDCL) ऑपरेटर म्हणून नोकरीस आहेत. त्यांची नेमणूक बाळदे (ता. शिरपूर) येथील उपकेंद्रावर असून, ते परिवारासह शिरपूर येथे बालाजीनगरात वास्तव्यास आहेत. गिधाडेच्या पुलावर प्रवीण गवते यांची मोटारसायकल व चपला पडलेल्या आहेत व ते कुठेही दिसत नाहीत; अशी माहिती त्यांना मिळाली. मासेमारी करणारे व पोहणाऱ्यांनी त्यास बाहेर काढले व शिंदखेडा ग्रामीण रुगणालयात दाखल केले असता वैद्यकीय अधिकारी डॉ. कुंदन वाघ यांनी मृत घोषित केले. पोलिस निरीक्षक सुनील भाबड यांच्या मार्गदर्शनाखाली पोलिस नाईक चेतन बोरसे तपास करीत आहेत.

व्हॉट्सॲप ग्रुपवर मेसेज

मृत प्रवीणने चिमठाणे येथील श्री सिद्धिविनायक व्हॉट्सॲप ग्रुपवर दोन वाजून ५१ मिनिटांनी एक पोस्ट टाकली आहे. त्यात त्याने लिहिलेस की माझ्या मागे चार- पाच गुंड पोरे लागली आहेत. ते सर्व अनोळखी आहेत, मला काही सुचत नाही. माझ्यासोबत तीन लाख रुपये आहेत. मी कसे तरी मला वाचविण्याचा प्रयत्न करत आहे. मला मदत..’ असा मेसेस टाकला होता.