धुळे : जिल्हा परिषदेच्या होऊ घातलेल्या पोटनिवडणुकीसाठी पंधरा गटातून १०७ तर ३० गणातून तब्बल १८० उमेदवार निवडणुकीच्या रिंगणात आहेत. उमेदवारी अर्ज माघार घेण्यासाठी २७ सप्टेंबरपर्यंत मुदत देण्यात आली आली आहे. (dhule-news-dhule-Zilla-Parishad-by-elections-107-nominations-from-15-groups)

ओबीसी आरक्षणाच्या कारणावरून राज्यातील पाच जिल्हा परिषदांच्या पोटनिवडणुका जाहीर करण्यात आल्या आहेत. या पोटनिवडणुकांचा कार्यक्रम राज्य निवडणूक आयोगाने जाहीर केला असून येत्या ५ ऑक्‍टोबरला मतदान प्रक्रिया पार पडणार आहे; तर ६ ऑक्टोबरला निवडणुकीचा निकाल जाहीर केला जाणार आहे.

भाजपचा लागणार कस

पोटनिवडणुकीसाठी जिल्हा परिषदेतील सत्ताधारी पक्षांसह विरोधी पक्षांनी कंबर कसली असून होणाऱ्या निवडणुकीत जास्तीत जास्त उमेदवार विजयी करण्यासाठी मोठ्या प्रमाणावर प्रयत्न सुरू झाले आहेत. धुळे जिल्हा परिषदेत भाजपची एक हाती सत्ता असून पंधरा गट आणि ३० गणांसाठी होणाऱ्या या पोटनिवडणुकीत भाजपला सर्वच जागांवर विजय मिळविण्यासाठी मोठ्या प्रमाणावर प्रयत्न करावे लागणार आहेत.

माघारीनंतर चित्र होणार स्‍पष्‍ट

निवडणुकीसाठी उमेदवारांची यादी प्रसिद्ध करण्यात आली असून पंधरा गटांसाठी १०७ तर तीस गणांसाठी १८० उमेदवार निवडणुकीच्या रिंगणात आहेत. येत्या २७ सप्टेंबरपर्यंत उमेदवारी अर्ज माघार घेण्यासाठी मुदत देण्यात आली असून उमेदवारी अर्ज माघारी घेण्यासाठी मोठ्या प्रमाणावर मनधरणी करण्याचे प्रयत्न सुरू आहेत. धुळे तालुक्यासाठी ही निवडणूक अतिशय प्रतिष्ठेची असून सर्वाधिक गट धुळे तालुक्यात आहेत. धुळे तालुक्यात ११ गटांसाठी तर आठ गणांसाठी ही पोटनिवडणूक होणार आहे. तसेच दोन माजी सभापती देखील या निवडणुकीच्या रिंगणात असून या दोन माजी सभापती पुढे विजयी होण्याचे मोठे आव्हान निर्माण झाले आहे. यामुळे सहा ऑक्टोबरला जाहीर होणाऱ्या निवडणुकीच्या निकालात कोणत्या पक्षाला किती जागा मिळतात हे बघणे महत्त्वाचे असणार आहे.