धुळे : विधानसभा निवडणुकीत बंडखोरी जवळपास सर्वच मतदारसंघात होत आहे. यात धुळे ग्रामीण मतदारसंघात देखील बंडखोरी झाल्याचे समोर आले आहे. शिवसेना ठाकरे गटातर्फे नाराज हिलाल माळी यांनी अपक्ष उमेदवारी अर्ज भरला असल्याने महाविकास आघाडीत बिघाडी झाल्याचे पाहण्यास मिळत आहे. 

धुळे (Dhule) ग्रामीण मतदार संघात महाविकास आघाडीत बिघाडी झाली आहे. ठाकरे गटाच्या शिवसेनेचे सहसंपर्क प्रमुख हिलाल माळी यांनी पदाचा राजीनामा देत अपक्ष उमेदवारी अर्ज दाखल केला आहे. धुळे ग्रामीणमधून शिवसेना (Shiv sena) ठाकरे गटातर्फे उमेदवारी करण्यासाठी माळी हे इच्छुक होते. परंतु धुळे ग्रामीणमधून काँग्रेसचे विद्यमान आमदार कुणाल पाटील यांना महाविकास आघाडीतील काँग्रेसतर्फे उमेदवारी जाहीर करण्यात आल्यानंतर हिलाल माळी हे नाराज होते. 

दरम्यान उमेदवारी न मिळाल्याने नाराज असलेले हिलाल माळी यांनी आज ठाकरे गट शिवसेनेला सोडचिठ्ठी देत पदाचा राजीनामा दिला. यानंतर त्यांनी आपला अपक्ष उमेदवारी अर्ज दाखल केला आहे. धुळे ग्रामीणचे मतदार आपल्याला नक्कीच मोठ्या मताधिक्याने निवडून देतील; असा विश्वास यावेळी हिलाल माळी यांनी व्यक्त केला आहे.