धुळे : धुळे– सुरत महामार्गावर (Dhule surat Highway) तेलाने भरलेला टँकरचा अपघात झाला. यात टँकर पलटी झाल्‍याने जमिनीवर तेल सांडले गेले. यावेळी नागरिकांनी हातात मिळेल ते भांडे घेऊन तेल भरून नेले.

साक्री तालुक्यात धुळे- सुरत महामार्गावर एका खाद्यतेलाच्या टँकरचा अपघात झाला. चालकाचे वाहनावरील नियंत्रण सुटल्याने तेलाने भरलेला टँकर रस्त्याच्या कडेला असलेल्या शेतात जाऊन पलटला. परंतु या अपघातामध्ये सुदैवाने कुठल्याही प्रकारची जीवीतहानी झाली नसून वाहन चालक व वाहक किरकोळ जखमी झाले आहेत.

भांडे घेवून नागरीकांच्‍या रांगा

खाद्यतेलाने भरलेला टँकर पलटल्याची माहिती परिसरातील गावांमध्ये वाऱ्यासारखी पसरली. परिसरातील ग्रामस्थांची मात्र चांगलीच चंगळ झाली. नागरिकांनी या पलटी झालेल्या टँकरमधून तेल वाहून नेण्यासाठी चक्क बादली, हंडे, कळशा, हातात मिळेल ते भांडे घेऊन टँकरच्या दिशेने धाव घेतली. टँकरच्या अवतीभवती तेल घेऊन जाण्यासाठी ग्रामस्थांची मोठ्या प्रमाणात गर्दी झाली. त्यामध्ये चक्क नागरिकांनी टँकरमधून तेल घेण्यासाठी लांबच लांब रांगा देखील लावल्याचे बघावयास मिळाल आहे.