मराठा आरक्षणासाठी तरुणाने आत्महत्या केल्याची धक्कादायक घटना समोर आली आहे. धाराशिवमध्ये २६ वर्षीय तरुणाने गळफास घेत आत्महत्या केली. आत्महत्येपूर्वी तरुणाने चिठ्ठी लिहिली होती. या घटनेमुळे धाराशिवमध्ये खळबळ उडाली आहे. घटनेची माहिती मिळताच धाराशिव पोलिसांनी घटनास्थळी धाव घेत तपास सुरू केला आहे

मिळालेल्या माहितीनुसार, धाराशिवच्या कळंब तालुक्यातील देवळाली गावात ही घटना घडली आहे. २६ वर्षीय तरुणाने शेतातील झाडाला गळफास घेऊन आत्महत्या केली. योगेश संजय लोमटे असे आत्महत्या केलेल्या तरुणाचे नाव आहे. मराठा आरक्षण मिळत नसल्याने तरुणाने आत्महत्या केल्याचा आरोप कुटुंबीयांनी केला आहे.

योगेशने आत्महत्या करण्यापूर्वी चिठ्ठी लिहिली होती. योगेशच्या खिशात मराठा आरक्षणासाठी आत्महत्या करत असल्याचा मजकूर लिहिलेली चिठ्ठी सापडली. योगेश लोमटे हा उच्चशिक्षित असून गेल्या काही वर्षांपासून तो नोकरीसाठी प्रयत्न करत होता. मराठा आरक्षण नसल्याने नोकरी मिळत नसल्यामुळे तो चिंतेत होता. चिंतेत असलेल्या योगेशने आत्महत्या करत जीवन संपवलं. पोलिस घटनास्थळी दाखल झाले असून पंचनामा करण्यात येत आहे.