बालाजी सुरवसे 
धाराशिव : पावसाळा सुरु झाल्यानंतर साथरोगांचा फैलाव झपाट्याने होत असतो. यात डेंग्यू व डेंग्यू सदृश्य आजाराने पाय पसरले असून धाराशिवच्या उमरगा शहरात देखील डेंग्यूची साथ जोरात सुरु आहे. या दरम्यान डेंग्यू सदृश्य आजाराने मागील आठ दिवसांमध्ये दोन विद्यार्थ्यांचा मृत्यू झाल्याची घटना घडली आहे.

उमरगा शहरातील सत्यजित हनुमंत देशमुख (वय १२) व ओम शिवाजी साळुंखे (वय १८) या दोन विद्यार्थ्याचा मृत्यू झाला आहे. पावसाळा सुरू झाल्यानंतर शहरात डेंग्यू या साथरोगाचा उद्रेक झाल्याचे पाहण्यास मिळत आहे. डेंग्यूसोबतच मलेरिया, टायफाईड, चिकुनगुनिया या सारख्या आजारांची लागण झालेल्या रुग्णांची संख्या देखील मोठी आहे. यामुळे शहरातील जवळपास सर्वच दवाखाने गर्दीने भरलेले आहेत. 

औषध, धूर फवारणी नाही 

उमरगा शहरात नागरपालिकेच्यावतीने औषध आणि धूर फवारणी होत नसल्याने डेंग्यूच्या रुग्ण संख्येत वाढ होत असल्याचा आरोप नागरिकांनी केला आहे. त्याचबरोबर नगरपालिकेने शहरांमध्ये स्वच्छतेसाठी उपाययोजना करण्याची मागणी देखील उमरगा शहरातील नागरिकांनी केली आहे.