बालाजी सुरवसे, धाराशिव

राज्यात महानगरपालिकेच्या निवडणुकांच्या तयारीला सुरुवात झाली असून जसं जशा निवडणुका जवळ येत आहेत तसं तसे राजकारण भलतेच तापताना पाहायला मिळतं आहे. महायुतीच ट्रिपल इंजिन सरकार सुरळीत सुरु असलं तरी युती अंतर्गत नेतेमंडळी एकमेकांवर आरोप प्रत्यारोप तसेच धुसफूस करत आहेत. अशातच धाराशिव जिल्ह्यात महायुतीतील घटक पक्ष शिवसेना आणि भाजपमध्ये वादाची चिन्ह दिसू लागली आहे.

माजी मंञी तानाजी सावंत यांनी भाजपाचे आमदार राणा जगजीत सिंह पाटील यांच्यावर केलेल्या टीकेनंतर आता राणा जगजीत सिंह पाटील यांचे कार्यकर्ते आक्रमक झाल्याचं चित्र दिसत आहे. सोशल मीडियाच्या माध्यमातून तानाजी सावंत यांच्यावर जोरदार टीका करण्यात येत असून,“काय म्हणताय धाराशिव? या टॅग लाईन खाली आमदार सावंत यांच्यावर त्यांनी केलेल्या वादग्रस्त वक्तव्याची आठवण करून देत टीका केली जात आहे.

माजी आरोग्यमंत्री तानाजी सावंत यांच्या काही जुन्या वादग्रस्त वक्तव्यांचा आधार घेत भाजप कार्यकर्त्यांनी सोशल मीडियावर टीकेची मोहीम उघडली आहे. “हाफकिन कोण आहे?”असा प्रश्न आरोग्यमंत्री असताना सावंत यांनी विचारला होता त्याचप्रमाणे,“महाराष्ट्राला भिकारी करीन,पण मी भिकारी होणार नाही”या वादग्रस्त वक्तव्याचा ही राणाजगजीतसिंह पाटील यांच्या कार्यकर्त्यांकडून सोशल मीडिया वरती उल्लेख केला जात आहे.

“काय म्हणताय धाराशिव?”या टॅगलाईनखाली भाजप कार्यकर्ते आणि समर्थक तानाजी सावंत यांच्यावर टीका करत आहेत.काही पोस्टमध्ये सावंत यांच्या कार्यपद्धतीवर प्रश्नचिन्ह उपस्थित करण्यात आलं आहे,तर काही पोस्टमध्ये थेट राजकीय आरोप करण्यात येत आहेत. या सगळ्या प्रकारामुळे धाराशिव जिल्ह्यात शिवसेना-भाजप यांच्यातील अंतर्गत वाद चव्हाट्यावर आला आहे.