बीडच्या गेवराई तालुक्यातील तलवाडा येथून एक धक्कादायक बातमी समोर येत आहे. दसऱ्याच्या मंगलमय दिवशी घराघरात आनंद आणि उत्साह असताना सोनवणे कुटुंबावर दुखा:चा डोंगर कोसळला आहे. आधी वडिलांनी आपल्या चार महिन्यांच्या गोंडल बाळाला पाण्याच्या बॅरेलमध्ये बुडवलं. नंतर स्वत: गळ्यात फास लावून आयुष्य संपवलं. या दुर्देवी घटनेनंतर परिसरात खळबळ उडाली आहे.

अमोल हौसराव सोनवणे (वय वर्ष ३०) असे निर्दयी वडिलांचं नाव आहे. चार दिवसांपूर्वी अमोल आणि त्याची पत्नी पायल यांच्यात घरगुती वाद झाला होता. रागाच्या भरात दोघांनी विषारी औषध प्राशन केलं. उपचारानंतर दि. २ ऑक्टोबर रोजी दोघे घरी परतले. पण दुसऱ्याच दिवशी पहाटे अमोलने टोकाचे पाऊल उचलले.

नेमके कोणत्या कारणातून हे घडले, याचा तपास सुरू असून अद्याप कारण समोर आलेले नाही. चार महिन्याच्या निष्पाप बाळाला पाण्यात टाकताना ते बाळ कोणत्या वेदना सहन करत असेल, याचा विचार जरी केला तरी हृदय पिळवटून जाते. आई पायल हिच्या डोळ्यांतून अखंड अश्रू वाहत आहेत. घरात उसळलेला रडण्याचा हुंदका संपूर्ण गावभर पोहोचला. कुणाच्याही डोळ्यात पाणी न येता राहिले नाही.

घटनेची माहिती मिळताच तलवाडा पोलीस स्टेशनचे स.पो.नि मनोज निलंगेकर, उपनिरीक्षक कैलास अनालदास, पो.ह शेख मोहसीन, पो.ह नारायण काकडे आणि चालक पो. पवन शेळके यांनी घटनास्थळी धाव घेत पंचनामा केला. अमोल आणि त्याच्या बाळाचे शवविच्छेदन तलवाडा प्राथमिक आरोग्य केंद्रात करण्यात आले. या दुर्दैवी घटनेने तलवाडा परिसर शोकाकुल झाला आहे.