अजय सोनवणे, साम टीव्ही

नाशिक: जिल्ह्यातील देवळा तालुक्यामधील पिंपळगाव वाखरी शिवारात देवळा-मालेगाव रोडवर झालेल्या भीषण अपघातात दोन जणांचा मृत्यू झाला आहे. मोटारसायकल आणि कार यांच्यात समोरासमोर झालेल्या धडकेत हा अपघात झाला. अपघातानंतर चारचाकी वाहन चालक घटनास्थळावरून फरार झाला आहे.

मिळालेल्या माहितीनुसार, आज संध्याकाळी सुमारे पाच वाजेच्या सुमारास हा अपघात झाला असून देविदास पांडुरंग देवरे (वय 26) आणि कैलाश पुंडलिक देवरे (वय 55) दोघेही रा.धोबीघाट, दहिवड (ता. देवळा) हे मोटारसायकलवरून दहिवडकडून देवळ्याकडे जात होते. त्याचवेळी देवळ्याकडून दहिवडकडे जाणाऱ्या कारने त्यांच्या मोटारसायकलला जोरदार धडक दिली.

या भीषण धडकेत मोटारसायकलवरील दोघांचा जागीच मृत्यू झाला. अपघातानंतर कारचा चालक वाहन घटनास्थळीच सोडून पसार झाला असून पोलीस त्याचा शोध घेत आहेत. घटनेची माहिती मिळताच देवळा पोलीस ठाण्याचे पोलीस निरीक्षक सार्थक नेहेते यांनी तात्काळ घटनास्थळी धाव घेतली. पोलिसांनी पंचनामा करून दोन्ही मृतदेह शवविच्छेदनासाठी देवळा ग्रामीण रुग्णालयात हलवले आहेत. या घटनेमुळे परिसरात हळहळ व्यक्त केली जात आहे.