अमरावती जिल्ह्यातील (Amravati District) तिवसा शहरात गेल्या सहा दिवसात तीन बालकांचा डेंग्यूने (Dengue) मृत्यू झाल्याने खळबळ उडाली आहे. विशेष म्हणजे यात लहान बालकांना सर्वाधिक डेंग्यूने ग्रासलं आहे. तिवसा येथील देवांश वाट वय १८, अजय रेवतकर वय ८ वर्ष व कृष्णा देशमुख वय १३ वर्ष या तीन बालकांचा सहा दिवसात डेंग्यूने मृत्यू झाला आहे.

तिवसा ग्रामीण रुग्णालयात महिनाभरात ४० रुग्ण डेंग्यू सदृश्य आढळून आले आहेत, तसेच अचलपूर व परतवाडा या जुळ्या शहरात २० दिवसापासून डेंग्यूचे मोठं तांडव सुरू आहे. या ठिकाणी २५० रुग्ण डेंग्यू सदृश्य आढळून आल्याने खळबळ उडाली आहे. येथे दहा डेंग्यू टेस्ट मध्ये सात डेंग्यू पॉझिटिव्ह निघत असल्याने आता कोरोना नंतर हे नवीन संकट अमरावतीत निर्माण झाले आहे.

तिवसा शहरात ठीक ठिकाणी पाणी साचलं असून दूषित व नियमित पाणी पुरवठा होत नाही तसेच फवारणी नियमित केली जात नाही असा आरोप स्थानिक नागरिकांनी केलाय, तिवसा तालुक्यातील मोठ्या प्रमाणावर बालकांंना डेंगूची लागण होत असल्याने बालकांच्या आरोग्याचा प्रश्न उपस्थित झाला आहे त्यामुळे प्रशासनाचे लक्ष देण्याची गरज आहे.

Edited By: Pravin Dhamale