बुलढाण्यात डिफेंरवरुन महायुतीत नवं वादळ उठलंय. शिंदेसेनेचे आमदार संजय गायकवाडांकडील डिफेंडर गाडी कोणत्या कामाच्या कमिशनमधून मिळाली, असा सवाल करत भाजपचे माजी आमदार विजयराज शिंदेंनी गायकवाडांना घेरलंय. तर ती गाडी नातेवाईक असलेल्या कंत्राटदाराच्या नावावर असल्याची कबुलीच संजय गायकवाडांनी दिलीय.

खरंतर बुलढाण्याचे आमदार संजय गायकवाडांनी विजयराज शिंदेंवर दीड कोटीच्या डिफेंडरचा आरोप केला होता. त्याला प्रत्युत्तर देतांना विजयराज शिंदेंनी गायकवाडांची नाकेबंदी केलीय. आता फक्त संजय गायकवाडच नाही तर मंत्री संजय शिरसाट आणि खासदार संदीपान भुमरेंच्या डिफेंडर गाड्यांवरुनही अंबादास दानवेंनी सवाल उपस्थित केलाय..

अंबादास दानवेंच्या आरोपानंतर साम टीव्हीने मंत्री संजय शिरसाट आणि खासदार संदीपान भुमरे वापरत असलेल्या डिफेंडर गाड्या कुणाच्या नावावर आहेत? त्याची माहिती घेतली. हा फोटो पाहा. मंत्री संजय शिरसाट वापरत असलेली ही आहे MH 20 GE 0001 डिफेंडर गाडी.ही गाडी सागर पवार यांच्या नावावर असल्याचं आढळून आलंय.

तर संदीपान भुमरे वापरत असलेली डिफेंडर गाडी MH 20 GK 0009 संजय भंडारी नावाच्या व्यक्तीच्या नावावर आहे. त्यामुळे आता आमदार, खासदार आणि मंत्री वापरत असलेल्या गाड्या जर नातेवाईक आणि कंत्राटदारांच्या नावावर असतील तर त्यामागे कुठली आर्थिक देवाण घेवाण दडलीय का? याचा शोध घेण्याची गरज आहे.