परभणी: पाथरी तालुक्यातील हादगाव, कासापुरी मंडळात मंगळवारी पहाटे तीन ते सकाळी नऊ वाजेपर्यंत जोरदार पाऊस बरसला. यात हातगाव मंडळात १३०.८ मिमी तर कासापुरी मंडळात १०६.८ मिमी पाऊस झाल्याने शेतातील खरीपाची पिके पाण्याखाली गेली. तर हातगाव बु. मध्ये घरात पाणी शिरल्याने संसारोपयोगी साहित्याचे मोठे नुकसान झाले आहे. (Crops submerged due to cloudburst rains in Parbhani; Large damage due to water intrusion in the house)

हे देखील पहा -

तालुक्यात मागील काही दिवसांपासुन मोठा खंड पडला होता. गत आठवड्यात रिमझिम पाऊस झाल्यानंतर मंगळवारी पहाटे तालुक्यातील पाथरी, हादगाव, बाभळगाव, कासापुरी या चारही महसुल मंडळात जोरदार पर्जन्यवृष्टी झाली. पहाटे तीन ते सकाळी नऊच्या दरम्यान हादगाव मंडळात जोरदार पाऊस झाला. यात एकट्या हादगाव मंडळात १३०.८ एवढा ढगफुटीसदृष्य पाऊस झाल्याने ओढे-नाले तुडुंब भरुन वाहत होते. तर शेतांना तळ्याचे स्वरुप प्राप्त झाल्याचे चित्र दिसुन येत आहे. यात सोयाबीन आणि कापसाच्या पिकांचे मोठे नुकसान झाले असून जमिनी खरडल्या आहेत. तर हातगाव बु. मधील अनेकांच्या घरात पाणी घुसल्याने संसारोपयोगी साहित्याचे नुकसान झाल्याचे या ठिकाणचे नागरीक पप्पू नखाते यांनी सांगितले.

या ढगफुटीसदृष्य पावसामुळे झालेल्या नुकसानीचे त्वरीत पंचनामे करून नुकसान भरपाई देण्याची मागणी ग्रामस्थांनी केली आहे. असाच काहीसा प्रकार कासापुरी महसुल मंडळात झाला असून या ठिकाणी १०६.८ मिमी पावसाची नोंद झाली आहे. तर बाभळगाव मंडळात ६२.३ तर पाथरी मंडळात ५५ मिमी पावसाची नोंद सरकारी दफ्तरात झाली असून सरासरी ८८.७ मिमी पाऊस जो की अतिवृष्टी मानला जातो एवढा पाऊस झाल्याने शेतपिकांचे मोठ्या प्रमाणात नुकसान झाले आहे.

Edited By - Akshay Baisane