Aurangabad Crime News : औरंगाबाद जिल्ह्यातून एक भयंकर घटना समोर आली आहे. पुणे महामार्गावर भरदिवसा एका तरुणांची कुऱ्हाडीचे वार करून निर्घृण हत्या करण्यात आली. बहिणीला पळवून नेल्याच्या रागातून भावाने ही हत्या केल्याची प्राथामिक माहिती आहे. या ऑनर किलिंगच्या घटनेमुळे परिसरात मोठी खळबळ उडाली आहे. (Latest Marathi News)

बापू खिल्लारे (वय 30 वर्ष) असं हत्या (Crime News) झालेल्या तरुणाचं नाव आहे. भररस्त्यात बापू याची हत्या करण्यात आल्याने परिसरात भीतीचं वातावरण पसरलं आहे. प्राप्त माहितीनुसार, बापू खिल्लारे याने ३ वर्षापूर्वी सासरच्या नातलगांचा विरोध झुगारून पळून जाऊन एका तरुणीशी प्रेम विवाह केला होता.

गुरूवारी (29 डिसेंबर) बापू हा औरंगाबाद-पुणे महामार्गावरून (Aurangabad) दुचाकीने जात असताना त्यांच्या मेव्हण्याने महामार्गावरील दहेगाव बंगला जवळील इसारवाडी फाटा येथे अडविलं कुठलिही विचारपूस न करता धारदार कुऱ्हाडीने बापू यांच्यावर हल्ला चढविला.

आरोपीने बापू याच्यावर कुऱ्हाडीने एका नंतर एक असे सपासप वार केले. यामध्ये बापू हा रस्त्यावरच कोसळला. धक्कादायक बाब म्हणजे, जेव्हा बापू रस्त्यावर तडफडत होता. त्याच वेळी मारेकरी हातात रक्ताने माखलेली कुऱ्हाड खांद्यावर ठेऊन तो प्रसंग पाहत उभा होता. हे भयावह दृश्य पाहून महामार्गाने जाणारे वाहनधारक देखील भयभीत झाले होते.

प्रत्यक्षदर्शींनी दिलेल्या माहितीनुसार, तडफडणाऱ्या बापू खिल्लारे याने रस्त्यावरच जीव सोडला. त्याच्या मृत्युची खात्री होताच मारेकऱ्यानं अंगावरील शर्ट काढला आणि तो शर्ट हवेत गोल फिरवत जल्लोष केला. तेथे नृत्य केलं आणि दुचाकीवरुन तिथून पसार झाला.

दरम्यान, घटनेची माहिती मिळताच पोलिसांनी तातडीने घटनास्थळी धाव घेत बापू याचा मृतदेह आपल्या ताब्यात घेतला. यावेळी बघ्यांची मोठी गर्दी जमली होती. हत्येनंतर आरोपी पसार झाला असून पोलिसांनी त्याच्या शोधात दोन पथके रवाना केली आहे. भररस्त्यात घडलेल्या या ऑनर किलिंगच्या घटनेनं परिसरात घबराटीचं वातावरण निर्माण झालं आहे.

Edited By - Satish Daud