भंडारा : भंडारा जिल्ह्यात सतत होणाऱ्या वातावरणातील बदलामुळे साथीच्या आजारांचा फैलाव वाढला असून डेंग्यूच्या आजाराने पुन्हा एकदा डोके वर काढले आहे. भंडाऱ्यात आज एका डेंग्यू रुग्णाचा मृत्यू झाला आहे. स्वप्नील चटप (वय 23) असे डेंग्यूमुळे मृत्यू झालेल्या तरुणाचे नाव आहे. त्याच्यावर नागपूर येथील एका खाजगी रुग्णालयात उपचार सुरु होते. मात्र, उपचारादरम्यान त्याचा मृत्यू झाला आहे.

हे देखील पहा -

स्वप्नील चटप याला चार दिवसापूर्वी ताप व डोकेदुखीसारखी लक्षणे जाणवू लागली. भंडारा शहरातील एका खाजगी डॉक्टरांकडे दाखविले असता त्यांनी व्हायरल इन्फेक्शन असल्याचे सांगितले, मात्र 3 दिवसानंतरही ताप कमी न झाल्याने त्याला दुसऱ्या डॉक्टरकडे नेण्यात आले.

तेथे रक्त व इतर चाचण्या केल्यानंतर स्वप्नीलला डेंग्यू झाल्याचे निष्पन्न झाले. डॉक्टरांनी त्याला ताबडतोब नागपूरला हलविण्यास सांगितले. मात्र नागपूर येथील एका खाजगी रुग्णालयात आज सकाळी उपचारादरम्यान त्याचा मृत्यू झाला. स्वप्नील हा एकुलता एक मुलगा असल्याने त्याच्या कुटुंबीयांवर दुःखाचा डोंगर कोसळला आहे. तर जिल्ह्यात जानेवारी महिन्यापासून आतापर्यंत 254 डेंग्यू संशयितांच्या तपासण्या करण्यात आल्या असून त्यापैकी 13 जणांना डेंग्यूची लागण झालेली असल्याचे निदर्शनास आले आहे.

Edited By : Krushnarav Sathe