लातूर जिल्ह्यातील निलंगा तालुक्यातील तांबडा जिल्हा परिषद गटातून एसटी प्रवर्गातील काँग्रेस पक्षाच्या अधिकृत उमेदवार अंजना चौधरी यांचा अपहरण झाल्याचा संशय व्यक्त करण्यात आला आहे. या प्रकरणामुळे जिल्ह्यात एकच खळबळ उडाली आहे. अंजना चौधरी या हळदी-कुंकवाच्या कार्यक्रमासाठी घराबाहेर पडल्या होत्या. त्यानंतर प्रचारासाठी जाणार असल्याचे त्यांनी कुटुंबीयांना सांगितले होते. मात्र, त्या त्यानंतर घरी परतल्या नाहीत. बराच वेळ उलटूनही संपर्क न झाल्याने कुटुंबीय आणि पक्ष कार्यकर्त्यांनी चिंता व्यक्त केली आहे.

या घटनेनंतर काँग्रेसच्या जिल्हाध्यक्षांसह पदाधिकाऱ्यांनी संबंधित पोलीस अधिकाऱ्यांची भेट घेतली असून, उमेदवाराच्या अपहरणाचा संशय व्यक्त करत अधिकृत निवेदन दिले आहे. उमेदवाराचा शोध घेण्यासाठी तात्काळ कारवाई करावी, अशी मागणी काँग्रेसकडून करण्यात आली आहे.

दरम्यान, जिल्हा परिषद आणि पंचायत समिती निवडणुकीसाठी उमेदवारी अर्ज माघारी घेण्यास अवघे दोनच दिवस शिल्लक असताना ही घटना घडल्याने राजकीय वर्तुळात विविध तर्कवितर्कांना उधाण आले आहे. ही घटना निवडणूक प्रक्रियेवर परिणाम करणारी ठरू शकते, अशीही चर्चा सुरू आहे.

पोलीस प्रशासनाकडून या प्रकरणाचा तपास सुरू असून, अंजना चौधरी यांचा शोध घेण्यासाठी पथके रवाना करण्यात आल्याची माहिती आहे.