विश्वभूषण लिमये, साम टीव्ही, प्रतिनिधी

Solapur : सोलापूरमधून एक दु:खद बातमी समोर आली आहे. काँग्रेसच्या माजी आमदार निर्मला ठोकळ यांचे वृद्धापकाळाने निधन झाले आहे. ८६ व्या वर्षी त्यांची प्राणज्योत मालवली. स्वातंत्र्यसैनिक तुळशीदास जाधव यांच्या कन्या आणि काँग्रेसच्या सक्रिय आमदार अशी त्यांची ओळख होती. आज (१६ सप्टेंबर) त्यांच्यावर सोलापूरमधील हिंदू स्मशानभूमीत अंत्यसंस्कार होणार आहेत.

मिळालेल्या माहितीनुसार, जेष्ठ नेत्या आणि काँग्रेस पक्षाच्या माजी आमदार निर्मला ठोकळे यांचे मंगळवारी (१६ सप्टेंबर) वृद्धापकाळाने निधन झाले आहे. वृद्धापकाळामुळे त्या बरेच दिवस राजकारणापासून दूर दिसून आल्या होत्या. त्यांचे पार्थिव सोलापूरातील छत्रपती शिवाजी महाराज चौक परिसरातील निराळे वस्तीकडे जाणाऱ्या रस्त्यावरील तोरणा बंगला या ठिकाणी आहे. सायंकाळी पाच वाजता त्यांच्यावर अंत्यसंस्कार करण्यात येणार असल्याची माहिती मिळाली.

निर्मला ठोकळ यांनी दोन वेळा आमदारपद भूषवले आहे. स्वातंत्र्यसैनियक तुळशीदास जाधव यांच्या त्या कन्या आहेत. काँग्रेस पक्षासह महिला चळवळीमध्ये त्यांचा सक्रीय सहभाग होता. त्यांच्या राजकीय कारकीर्दीची सुरुवात नगरसेविका म्हणून झाली. १९७२-७६ यादरम्यान निर्मला ठोकळ सोलापूर शहर दक्षिणमधून काँग्रेसपक्षातर्फे विधानसभेवर निवडून आल्या.

१९८२ मध्ये ॲड. बाबासाहेब भोसले हे महाराष्ट्र राज्याचे मुख्यमंत्री झाले. तेव्हा निर्मला ठोकळ या राज्यपाल कोट्यातून आमदार म्हणून विधान परिषदेवर गेल्या होत्या. सोलापूर शहराच्या राजकारणात त्यांनी कायम सहभाग नोंदवला. काँग्रेस पक्षाच्या वरिष्ठ नेत्यांमध्ये मार्गदर्शक म्हणून त्यांनी काम पाहिले. त्यांच्या अनेक शैक्षणिक संस्था देखील आहेत.