रणजित माजगांवकर, साम टीव्ही

कोल्हापूर : भाजपकडून जाणीवपूर्वक महापुरुषांच्या इतिहासात बदल करण्याचा प्रयत्न सुरू असून ही भाजपची वैचारिक दिवाळखोरी असल्याची जोरदार टीका काँग्रेस नेते आमदार सतेज पाटील यांनी केली आहे. रवींद्र चव्हाण यांच्या वक्तव्यावरून त्यांनी भाजप, मुख्यमंत्री देवेंद्र फडणवीस आणि केंद्रातील नेतृत्वावरही प्रश्न उपस्थित केले.

कोल्हापुरात माध्यमांशी बोलताना सतेज पाटील यांनी अनेक मुद्द्यांवर भाजपवर हल्लाबोल केला. भाजपची ही वैचारिक दिवाळखोरी आहे. मुख्यमंत्री देवेंद्र फडणवीस यांना रवींद्र चव्हाण यांची भूमिका मान्य आहे का, हे त्यांनी स्पष्ट करावं. केंद्रातील भाजपच्या नेत्यांनीही यावर भूमिका मांडली पाहिजे. आधी चुकीचं वक्तव्य करायचं, डिजिटल फुटप्रिंट ठेवायचा आणि नंतर माफी मागायची हा भाजपचा ठरलेला षडयंत्र आहे. रवींद्र चव्हाण यांच्यामध्ये मॅच्युरिटी दिसत नाही. महापुरुषांचा इतिहास वेगळ्या पद्धतीने जनतेसमोर मांडून संभ्रम निर्माण करण्याचं काम भाजप करत आहे. पुढच्या शंभर वर्षांसाठी इतिहास बदलण्याचं नियोजन भाजपने केलं आहे.

याचवेळी मुख्यमंत्री देवेंद्र फडणवीस आणि उपमुख्यमंत्री अजित पवार यांच्यावरही सतेज पाटील यांनी निशाणा साधला. मुख्यमंत्री देवेंद्र फडणवीस आणि अजितदादा मतांसाठी एकमेकांच्या विरोधात भांडतात, पण मुळात हे एकच आहेत. फक्त जनतेला दाखवण्यासाठी भांडणं सुरू आहेत. अजित पवार पुण्याचे पालकमंत्री आहेत, हे दोघांनीही आरशासमोर उभं राहून स्वतःला विचारावं'.

महापालिका निवडणुकांबाबत बोलताना बिनविरोध नगरसेवक निवडीवरही त्यांनी नाराजी व्यक्त केली. नगरसेवक बिनविरोध होणं म्हणजे लोकशाही संपवण्यासारखं आहे. तुमचा उमेदवार निवडून येऊ द्या, पण किमान इतरांना उभं राहू द्या. स्वर्गीय पंतप्रधान मनमोहन सिंग यांनी शहरांच्या विकासासाठी एक लाख कोटींचा निधी दिला होता. शहरांसाठीची पहिली योजना मनमोहन सिंग यांनीच आणली होती, हे कदाचित मुख्यमंत्री देवेंद्र फडणवीस विसरले असतील.

सुजात आंबेडकर यांच्या वक्तव्यावर प्रतिक्रिया देताना सतेज पाटील म्हणाले, सुजात आंबेडकर यांनी अशा प्रकारची वक्तव्य करणं संयुक्तिक नाही. किमान 15 तारखेपर्यंत आपलं आपलं टार्गेट भाजप असलं पाहिजे, असे ते म्हणाले.