Mumbai News: निवडणूक आयोगाने (Election Commission) शिवसेना पक्ष (Shivsena) आणि चिन्हाचा निर्णय दिल्यानंतर दोन्ही गटांमधील संघर्ष वाढताना दिसत आहे. एकीकडे संजय राऊत (Sanjay Raut) शिंदे गटावर निशाणा साधत असतानाच शिंदे गटाचे आमदारही राऊतांवर टीका करताना दिसत आहेत. त्यामुळेच शिंदे गट आणि ठाकरे गट असा संघर्ष पाहायला मिळत असतानाच संजय राऊत यांची शिवसेनेच्या संसदीय नेतेपदावरुन हकालपट्टी करण्यात आली आहे. (Maharashtra Politics)

याबाबत अधिक माहिती अशी की, शिवसेनेच्या संसदीय नेतेपदावरुन संजय राऊत यांना हटवले आहे. त्यांच्या जागी संसदीय नेतेपदी खासदार गजानन किर्तीकर (Gajanan Kirtikar) यांची निवड करण्यात आली आहे. याबाबत मुख्यमंत्री एकनाथ शिंदे (Eknath Shinde) यांनी लोकसभा अध्यक्षांना पत्र लिहून माहिती दिली आहे.

राऊतांना पदावरुन हटवून एकनाथ शिंदेंनी मोठा धक्का दिला आहे. यांसंदर्भात काही दिवसांपूर्वीच खासदार राहुल शेवाळे यांनी पत्रकारांना तशी माहितीही दिली होती. त्यानुसार, आज ही निवड करण्यात आली आहे.

दरम्यान, मागील काही दिवसापूर्वीच शिवसेना नेते आणि खासदार गजानन किर्तीकर यांनी एकनाथ शिंदे यांच्या उपस्थितीत शिंदे गटात प्रवेश केला होता. गजानन किर्तीकर यांनी वर्षा बंगल्यावर जाऊन एकनाथ शिंदे यांची भेट घेतली होती. त्यानंतर रविंद्र नाट्य मंदिर येथील एका कार्यक्रमात गजानन किर्तीकर यांनी शिंदे गटामध्ये प्रवेश केला होता.