Chitra Wagh: राज्याच्या राजकारणात सध्या चित्रा वाघ आणि उर्फी जावेद यांच्यातील वाद चांगलाच रंगला आहे. उर्फी जावेदचा नंगा नाच मी चालू देणार नाही, अशी भूमिका चित्रा वाघ यांनी घेतली होती. ज्यानंतर या सगळ्या वादाला सुरूवात झाली होती. या प्रकरणात उर्फी जावेदने चित्रा वाघ यांची महिला आयोगाकडे तक्रार केल्याचीही माहिती समोर आली आहे.

याच पार्श्वभूमीवर चित्रा वाघ (Chitra wagh) यांनी पत्रकार परिषद घेत उर्फी जावेदवर पुन्हा एकदा जोरदार निशाणा साधला आहे.

उर्फी जावेदने महिला आयोगाकडे तक्रार दाखल केल्यानंतर चित्रा वाघ यांनी पुन्हा एकदा उर्फी जावेदवर निशाणा साधला. उर्फीचा नंगानाच महाराष्ट्रात चालू देणार नाही असे त्यांनी यावेळी पुन्हा एकदा ठणकावले आहे.

यावेळी बोलताना "माझा वाद हा त्या बाईशी नसून तिच्या विकृतीशी आहे. ही महाराष्ट्राची संस्कृती नाही. छत्रपती शिवरायांच्या पुरोगामी महाराष्ट्राला हे शोभत नाही. तसेच हे माझ्या घरासाठी करत नसून समाजासाठी करत आहे, मात्र मलाच घेरण्यासाठी सगळे उभे राहिले आहेत. तरीही कोणी सोबत नसले तरी मी हा लढा सुरू ठेवणार" असल्याचे चित्रा वाघ म्हणाल्या. त्याचबरोबर हा नंगानाच तुम्हाला मान्य आहे का?" असा सवालही त्यांनी विरोधकांना केला.

यावेळी पुढे बोलताना "या प्रकरणाबद्दल घाणेरड्या पद्धतीने मला घेरण्याचा प्रयत्न करत आहेत. त्यामुळे मला आज त्रास होतोय, मात्र मी एकाकी नाही, मला महाराष्ट्रातील माता माऊलींनी सपोर्ट केला आहे. आज आवाज उठवला नाही तर हा नंगानाच महाराष्ट्रभर सुरू होईल," असेही चित्रा वाघ म्हणाल्या.

दरम्यान, या प्रकरणात उर्फी जावेद (Urfi Javed) राज्य महिला आयोगांची भेट घेणार असून या भेटीसाठी ती महिला आयोगाच्या कार्यालयात दाखल झाल्याचीही माहिती समोर आली आहे.