राज्यात आगामी स्थानिक स्वराज्य संस्थांच्या निवडणुकांचं बिगुल वाजलं आहे. नगर परिषद आणि नगरपंचायत निवडणुकीसाठी लवकरच मतदान होणार आहे. डिसेंबरच्या पहिल्या आठवड्यात मतदान प्रक्रिया पार पडेल. मात्र, अद्याप महानगरपालिका निवडणुकांबाबत तारखा समोर आलेल्या नाहीत. नगर परिषद आणि नगरपंचायतीच्या निवडणुका झाल्यानंतर महापालिकेच्या निवडणुका होतील, जानेवारी अखेरपर्यंत निवडणुका पार पडतील, असा अंदाज वर्तवण्यात येत आहे.

या पार्श्वभूमीवर राज्यात राजकीय घडामोडींना वेग आला आहे. कुठे फोडाफोडीचं तर कुठे स्वखुशीने पक्षाची साथ सोडण्यात येत आहे. तर, काही पक्षाकडून स्वबळाचे नारे देण्यात येत आहे. अशातच छत्रपती संभाजीनगरमध्ये मोठी राजकीय घडामोड घडली आहे.

आगामी महापालिका निवडणुकांच्या तोंडावर छत्रपती संभाजीनगरमध्ये शिवसेना बाळासाहेब ठाकरे गटाला झटका बसला आहे. कारण माजी आमदार स्वर्गीय आर. एम. वाणी यांचा मुलगा सचिन वाणी यांनी ठाकरे गटाची साथ सोडण्याचा निर्णय घेतला आहे. सचिन वाणी यांनी ठाकरे गटाची साथ सोडून भाजप पक्षात जाण्याचा निर्णय घेतला आहे.

स्थानिक स्वराज्य संस्थेच्या निवडणुकांच्या तोंडावर शिवसेना ठाकरे गटाला जोरदार झटका बसणार आहे. मागच्या वर्षी संजय शिरसाट यांच्या विरोधात विधानसभा निवडणूक लढवणारे राजू शिंदे यांनी ठाकरे गटाला जय महाराष्ट्र केलं होतं. आज भाजप पक्षात पुन्हा प्रवेश करणार असल्याची माहिती आहे.

तसेच शिवसेनेचे माजी आमदार स्वर्गीय आर. एम. वाणी यांचा मुलगा सचिन वाणी यांनी शिवसेना ठाकरे गटाला रामराम करण्याचा निर्णय घेतला आहे. आज सचिन वाणी भाजप पक्षात प्रवेश करणार आहेत. यामुळे शिवसेना ठाकरे गटाला मोठा झटका मानला जात आहे. दरम्यान, दोन्ही नेत्यांनी पक्षाची साथ सोडल्यामुळे वैजापूर शहरात शिवसेना ठाकरे गटाचे अस्तित्व जवळपास संपुष्टात असल्याचं बोललं जात आहे.

मिळालेल्या माहितीनुसार, दोन दिवसांपूर्वी सचिन वाणी यांनी शिवसेनेच्या समर्थकांसह मुख्यमंत्री देवेंद्र फडणवीस यांची भेट घेतली होती. गेल्या काही दिवसांपासून सचिन वाणी पक्षाला सोडचिठ्ठी देणार असल्याची चर्चा होती. याच चर्चांना पूर्णविराम मिळाला आहे. सचिन वाणी यांचा भाजप प्रवेश निश्चित झालं आहे. सचिन वाणी यांच्यासोबत अनेक पदाधिकारी देखील भाजपमध्ये प्रवेश करत आहेत.