नवनीत तापडिया, प्रतिनिधी...

Chhtrapati Sambhajinagar News: रस्त्याच्या चुकीच्या बाजूने (Wrong side) आणि एकेरी वाहन चालवणे, नो-एंट्री झोनमध्ये दुचाकी चालवणारे दुचाकीस्वार वाहनचालकांची संख्या छत्रपती संभाजीनगर शहरात वाढत आहे. वाहतूक पोलिसांच्या नोंदींमधून (Traffic police Report) ही बाब समोर आली आहे. त्यामुळे मोठी वाहतूक कोंडी होत असून याविरोधात आता शहर पोलिसांनी कारवाईचा बडगा उचलला आहे.

याबाबत अधिक माहिती अशी की, गेल्या काही दिवसांत शहरात वाहतूक व्यवस्थेचे तीन तेरा वाजले आहेत. मुख्य रस्ते असो की अंतर्गत रस्ते, जूने शहर असो की नवे सर्वच ठिकाणी प्रचंड वाहतूक कोंडी होत असते. सध्या शाळा सुरू झाल्या आहेत. त्यामुळे सकाळी शाळा भरण्याच्या वेळी आणि सुटण्याच्या वेळी सर्वच मुख्य रस्त्यावर वाहतुकीची कोंडी होते.

विशेष म्हणजे राँग साईडने जाणाऱ्यांची संख्या अधिक असल्याने यामुळे देखील वाहतूक कोंडी होते. त्यामुळे शहरातील वेगेवेगळ्या भागात पोलिसांनी कारवाई सुरु केली आहे. काल दिवसभरात वन-वे आणि नो एन्ट्रीमध्ये वाहने घालून नियम तोडणाऱ्या एकूण 304 लोकांवर कारवाई करण्यात आली असून, त्यांना 2 लाख 61 हजारांचा दंड ठोठावण्यात आला आहे.

काल (२७ जून) ला शहरात वरिष्ठ पोलिस अधिकाऱ्यांसह शेकडो वाहतूक पोलिस रस्त्यावर उतरले. एकीकडे रिमझिम पाऊस सुरु तर दुसरीकडे पोलिसांकडून कारवाईचा धडाका सुरु होता. त्यामुळे अनेक ठिकाणी वादाचे प्रसंग घडले. मात्र बेशिस्तपणे वाहन चालवणाऱ्यांवर अशा कारवाईमुळे आळा बसेल.. असे प्रशासनाकडून सांगण्यात येत आहे. (Latest Marathi News)