राष्ट्रवादीचे नेते छगन भुजबळ सध्या राजकीय वर्तुळामध्ये चर्चेचे केंद्र बनले आहेत. खातेवाटपामध्ये संधी न मिळाल्याने भुजबळांनी उघडपणे नाराजी व्यक्त केली. अजित पवार यांनी मंत्रिपद न दिल्याने त्यांनी आपल्याच पक्षाच्या नेत्यांविरोधात दंड थोपटले आहेत. ते मुख्यमंत्री देवेंद्र फडणवीस यांच्या भेटील पोहोचले आहेत. त्यांच्या या भेटीमुळे राजकीय घडामोडींना वेग आला आहे. थोड्याच वेळात ते पत्रकार परिषद घेणार असून आपली भूमिका मांडणार आहेत.

विधानसभा निवडणुकांमध्ये महायुतीला बहुमत मिळाले. त्यानंतर महिन्याभरात मंत्रिमंडळ विस्तार देखील झाला. महायुतीतील बऱ्याच नेत्यांना मंत्रिपदाची अपेक्षा होती. यातील बऱ्याच नेत्यांचा अपेक्षाभंग झाला. त्यात राष्ट्रवादी अजित पवार गटाच्या छगन भुजबळ यांचाही समावेश होता.

मंत्रीपद न मिळाल्याने छगन भुजबळ अत्यंत आक्रमक झाले आहेत. त्यांनी पक्षाच्या नेतृत्वाविरुद्ध दंड थोपटत नाराजी व्यक्त केली आहे. त्यात आपल्याला मंत्रीपद मिळावे याकरीता देवेंद्र फडणवीस आग्रही होते असे भुजबळांनी म्हटले. आता ते फडणवीस यांच्या भेटीला पोहोचले आहेत. या भेटीदरम्यान दोघांमध्ये काय चर्चा होईल याकडे सर्वांचे लक्ष लागले आहे.

राष्ट्रवादीमध्ये असताना संधी न मिळाल्याने छगन भुजबळ आता भाजपच्या वाटेला जाणार का अशी चर्चा सुरु झाली होती. मुख्यमंत्र्यांच्या भेटीनंतर आता भुजबळ आपली बाजू समोर मांडणार आहेत. भेट पूर्ण झाल्यानंतर ते पत्रकार परिषद घेणार आहेत. पत्रकार परिषदेमध्ये भुजबळ निर्णय सांगू शकतात असेही म्हटले जात आहे.