पंढरपूर - कोरोना (Corona) प्रतिबंधात्मक लस न घेताच एका तरूणाला पहिला डोस पूर्ण झाल्याचे प्रमाणपत्र मिळाले आहे. हा धक्कादायक प्रकार माळशिरस तालुक्यातील माळीनगर येथील गौरव गणेश टिळकर या तरूणाच्या बाबतीत घडला आहे. या प्रकारामुळे लसीकरण मोहिमेतील (Vaccination campaign) सावळा गोंधळ समोर आला आहे. गौरवने 15 ते 18 वयोगटातील लसीकरणाच्या पहिल्या डोससाठी काही दिवसांपूर्वी अकलूज उपजिल्हा रुग्णालयात लस मिळण्याकरिता ऑनलाईन पध्दतीने नोंदणी केली होती.

हे देखील पहा -

सध्या 15 ते 18 वयोगटासाठी कोव्हॅक्सिन लस दिली जाते. गौरव सोलापूरच्या गव्हर्नमेंट पॉलिटेक्निक कॉलेजमध्ये दुसऱ्या वर्षात शिक्षण घेत आहे. कॉलेजमधील उपस्थितीसाठी लसीकरण बंधनकारक केल्याने त्याने ऑनलाईन नोंदणी केली होती. गौरव काल लस घेण्यासाठी अकलूज येथील उपजिल्हा रुग्णालयात गेला होता. त्यावेळी 18 वर्षे पूर्ण व्हायला आणखी काही महीने बाकी असल्याचे सांगून त्याला कोव्हीशील्ड ही लस कर्मचाऱ्यांनी दिली नाही.

मात्र त्याचे लसीकरण झाल्याची ऑनलाईन नोंद मात्र संगणकावर करण्यात आली. त्यामुळे लस न देताच गौरवला कोरोना प्रतिबंधक कोव्हीशील्ड लसीचा पहिला डोस घेतल्याचे प्रमाणपत्र मिळाले झाले. त्यामुळे लसीकरण मोहिमे विषयी साशंकता निर्माण झाली आहे. बोगस लसीकरणीची प्रकरणे समोर येत असताना आणखी एक प्रकार समोर आला आहे.

Edited By - Shivani Tichkule