पंढरपूर - सोलापूर (Solapur) जिल्ह्यातील श्रीपूर येथील बॅक ऑफ महाराष्ट्र शाखेतून काही शेतकऱ्यांच्या नावे बोगस ठिबक सिंचन कर्ज उचलल्याचा धक्कादायक प्रकार समोर आला होता. याप्रकरणी शेतकऱ्यांनी तक्रार केली होती. तक्रारीनंतर बँक ऑफ महाराष्ट्रच्या (Bank of Maharashtra) वरिष्ठ कार्यालयाकडून चौकशी करण्यात आली.

हे देखील पाहा -

या चौकशीमध्ये बँक ऑफ महाराष्ट्राचे तत्कालीन मॅनेजर एस जाफर एस.आर. अहमद यांच्यासह 25 कर्जदारांवर 92 लाख 60 हजार रुपयांचा अपहार केल्याप्रकरणी त्यांच्यावर अकलूज पोलीस ठाण्यात गुन्हा नोंद करण्यात आला आहे. माळशिरस व पंढरपूर तालुक्यातील काही शेतकऱ्यांच्या नावे बोगस ठिबक सिंचनाची व पीक कर्जे काढून ती रक्कम बँक मॅनेजरने परस्पर हडप केल्याची तक्रार शेतकऱ्यांनी बँकेकडे केली होती.

या तक्रारीची गंभीर दखल घेऊन बँकेने तपास अधिकाऱ्याची नियुक्ती केली होती. तपास अधिकाऱ्यांनी केलेल्या चौकशीमध्ये बँकेचे तत्कालीन मॅनेजर जाफर एस. आर. अहमद यांनी 2013 ते 2018 या काळामध्ये पंचवीस शेतकऱ्यांच्या नावे 92 लाख 60 हजार रुपयांची बोगस कर्जे काढून ती रक्कम स्वतः घेतल्याचे तपासामध्ये निष्पन्न झाले आहे. त्यानंतर बँकेचे अधिकारी दत्तात्रय मधुकर कावेरी यांनी बँकेचे तत्कालीन मॅनेजर जाफर एस.आर. अहमद यांच्यासह इतर 25 कर्जदारांवर गुन्हा दाखल करण्यात आला आहे.