Buldhana News: समृद्धी महामार्गावरील अपघातांचे सत्र सुरूच आहे. आजही समृद्धी महामार्गवर एक भीषण अपघात झाला आहे. बुलडाणा येथील देऊळगाव कोळ गावाजवळ हा अपघात झाला असून यात तिघांचा मृत्यू झाला आहे.

मिळालेल्या माहितीनुसार, भरधाव कार इम्पॅक्ट बॅरियरला धडकून भीषण अपघात (Accident) झाल्याची घटना आज सकाळी घडली होती. अपघातानंतर कारने पेट घेतला. अपघातात दोघांचा घटनास्थळीच होरपळून मृत्यू झाला तर तिसरा प्रवासी मध्यप्रदेशातील शजापुर येथील रहिवासी असलेला दिनेश भीलाला याचा उपचारा दरम्यान मृत्यू झाला.

या अपघातातील घटनास्थळी मृत्यू झालेल्या दोघा मृतकांची अद्याप ओळख पटलेली नाही. तर तिसरा मृतक दिनेश भिलाला याचे नातेवाईक मध्यप्रदेशातून आल्यावर इतर दोघे त्यांच्या ओळखीचे होते का, याचा खुलासा होणार आहे. यात डिझेल चोरीच्या टोळीचा संशय असल्याचं पोलिसांनी सांगितलं आहे. त्यादृष्टीने तपास सुरु असल्याची माहिती पोलिसांनी दिली आहे.  (Buldhana News)

अपघात एकाच कुटुंबातील ४ भावंडांचा मृत्यू

दरम्यान 22 मे रोजी तेलंगाना येथील काकांच्या अंत्यविधीच्या कार्यक्रम आटोपून सुरतकडे जाणाऱ्या भावंडांच्या चारचाकी वाहनाचा भीषण अपघात (Accident) झाला. यात एकाच कुटुंबातील चार भावंडांचा मृत्यू झाला आहे. चालकाला झोपेची डुलकी लागल्याने वाहनावरील नियंत्रण सुटले व गाडी (Samruddhi Mahamarg) दुभाजकावर आदळून भीषण अपघात झाला.